Инфантино ја продолжува својата кампања за реизбор на чело на ФИФА во Јапонија

Кампањата на Џани Инфантино за реизбор на функцијата претседател на Меѓународната федерација на фудбалски асоцијации (ФИФА) оваа недела се сели во Јапонија, каде што за утре е закажана средба со претставници на Азиската фудбалска конфедерација (АФЦ).

Ова доаѓа по инцидентот што се случи минатата недела во Цирих, кога Инфантино му се извини на Советот на ФИФА за грешките направени при изготвувањето на план, вреден 4,2 милијарди долари, за продажба на правата за Светското првенство – предлог од кој во меѓувреме се се откажа.

Средбата со челниците на азискиот фудбал ќе се одржи во еден хотел во Токио, со минимално присуство на медиумите.

- Advertisement -

Претседателот на АФЦ, шеикот Салман бин Ибрахим Ал Калифа, првично се спротивстави на планот на Инфантино, но – според „Атлетик“ (*The Athletic*) – можно е да го променил ставот и да се приближил до првиот човек на ФИФА.

Инфантино им понуди на своите критичари отворена, независна ревизија на начинот на кој ФИФА ги носи своите одлуки.

Според пресметките на „Асошиејтед прес“ (АП), Инфантино е блиску до обезбедување просто мнозинство гласови од 211-те национални асоцијации членки на ФИФА – прагот што му е потребен за да освои четврти мандат во март.

Некои од одлучувачките гласови би можеле да дојдат од Азија. АФЦ се приклучи на критиките упатени кон Инфантино по неговиот предлог за продажба на правата за Светското првенство, иако се чини дека земјите-членки на оваа конфедерација се далеку од обединети.

Катар, домаќинот на Светското првенство во 2022 година, изрази поддршка за лидерот на ФИФА, додека Јордан се изјасни против него.

Следната седница на Советот на ФИФА е закажана за 16 декември во Доха, Катар.

Според АП, 87 од 211-те национални асоцијации членки на ФИФА изразиле поддршка за Инфантино – било преку поединечни изјави или преку приклучување кон изјавите за поддршка издадени од нивните соодветни регионални конфедерации. Најголемиот блок на опозиција против Инфантино доаѓа од Европа.

Ниту еден актуелен претседател на ФИФА нема изгубено на избори уште од 1974 година.

Крајниот рок за поднесување кандидатури за трката против Инфантино е 18 ноември.