Индија ги предупредува граѓаните да не се приклучуваат кон руската војска за време на војната во Украина

Индија во четвртокот ги предупреди своите граѓани да не се пријавуваат во руската војска за време на војната во Украина, оценувајќи го таков потег како опасен.

Министерството за надворешни работи на Индија соопшти дека продолжува да добива извештаи за регрутирање на индиски државјани во руските вооружени сили и постојано укажува на поврзаните ризици и опасности.

Министерството посочи на бројни случаи во кои поединци доброволно барале можности да се приклучат кон руските вооружени сили – очекувајќи финансиска добивка – за подоцна да побараат од индиската влада да им обезбеди ослободување од службата.

- Advertisement -

„Повторуваме дека ова е опасен пат и потег од кој владата силно одвраќа“, се вели во соопштението.

Се додава дека имало случаи кога поединци им се обратиле на индиските власти за доброволно да се откажат од индиското државјанство, да добијат руски пасош и потоа да се пријават во руските вооружени сили.

Министерството ги предупреди поединците да ја земат предвид сериозноста на таквите постапки и да бидат свесни за смртоносните опасности на кои се изложуваат.

Според информациите, индиската влада продолжува да соработува со руските власти за да ја осигури безбедноста и благосостојбата на сите индиски државјани кои служат во руските вооружени сили и да обезбеди нивно што поскоро ослободување од службата. Според податоците објавени минатиот месец, 227 индиски државјани биле регрутирани во руската армија од почетокот на војната во 2022 година. Од тој број, 139 се ослободени од служба, а 51 загинале.

„Ова е прашање за кое постојано разговараме со руската страна“, изјави минатиот месец во Њу Делхи индискиот државен секретар за надворешни работи, Викрам Мисри.