И ЗАМЕНСКА ТЕРАПИЈА ЗА НИКОТИН ВЛЕЗЕ ВО ЛИСТАТА НА ЛЕКОВИ

По повеќе од 10 години Македонија доби ажурирана листа на есенцијални лекови коишто мора да им бидат достапни на здравствените работници во третманот на пациентите. Систематизирана во 28 терапевски области, дефинирана во подгрупи, оваа обновена листа нуди и 193 нови лека.

Листата којашто содржи вкупно 372 лека содржи и јасни патокази што треба да се направи доколку одреден лек не е достапен и која е неговата адекватна замена. Новина е и тоа што антибиотиците се поделени на три подгрупи, воведени се нови терапевтски области како мултиплекс склероза, цистична фиброза, современа терапија за ХИВ, хепатитис Б и Ц, онколошки терапии…

– ​Оваа листа имаше потреба да биде ажурирана од претходно, бидејќи во овие 11 години, Светската здравствена организација има направено неколку поголеми промени на својата листа. Во основа, потребата за ажурирање на оваа есенцијална листа е заснована од ажурирањето на есенцијалната листа на Светската здравствена организација. Оваа есенцијална листа е донесена низ еден многу партиципативен процес преку Националната платформа за лекови, којашто ги вклучи институциите, стручната јавност и пациентските организации – рече министерот за здравство Сашо Клековски на денешната промоција на есенцијалната листа на лекови.

- Advertisement -

Според Клековски, важно е и тоа што со оваа листа се внимава и на превенцијата. Така, на пример за првпат се воведува заменска терапија за никотин што според министерот, треба да поттикне да се размислува превентивно на ракот на белите дробови.

– Да не чекаме нови 11 години за апдејт, да го воспоставиме механизмот за редовни ажурирања на оваа листа. Ажурирањата не се неопходни секои 6 или 12 месеци, меѓутоа мора да го следат ритамот на поголеми промени во Светската здравствена организација, па кога ќе се случи позначајна промена во есенцијалната листа на Светската здравствена организација, истата да биде применета и во националната регулатива во Македонија – нагласи Клековски.

И првиот човек на Светската здравствена организација во земјава доктор Акеем Али, порача дека институционализирањето на редовното ажурирање на листата преку новиот Закон за лекови ќе биде од клучно значење за да се обезбедат нејзината континуирана релевантност, одговорност кон потребите и довербата на јавноста.