Хеликоптер се урна во океанот во близина на Лос Анџелес: двајца загинати, едно лице се води како исчезнато

Хеликоптер на итната медицинска служба се урна во Тихиот Океан, во близина на островот Каталина и градот Лос Анџелес, во средата вечерта. Во несреќата загинаа две лица, две беа пренесени во болница, а едно лице сè уште се води како исчезнато, соопштија властите.

Џонатан Торес од Противпожарната служба на округот Лос Анџелес ја потврди смртта на две лица и изјави дека уште две лица се пренесени во блиските болници, додека спасувачките екипи продолжуваат со потрагата по петтото лице. Според телевизијата KTLA, во хеликоптерот се наоѓале пилотот, медицинска сестра, пациент и уште две лица.

Според Џенис Хан, членка на Надзорниот одбор на округот Лос Анџелес, хеликоптерот се урнал кратко по полетувањето од островот Каталина. Службите за итни случаи биле известени за инцидентот нешто пред 20:00 часот по локално време. Припадници на Крајбрежната стража на САД, заедно со други спасувачки екипи, излегле на местото на настанот и ја продолжиле потрагата по исчезнатото лице во текот на ноќта.

- Advertisement -

Еден од преживеаните е пренесен во болница во Лос Анџелес; неговата здравствена состојба засега е непозната.

Островот Каталина се наоѓа на околу 35 километри од брегот на округот Лос Анџелес. Властите соопштија дека по падот, хеликоптерот завршил во водата на длабочина од околу 73 метри. Хеликоптерот ѝ припаѓал на служба за итна медицинска помош од воздух.
Според информациите, хеликоптерот ѝ припаѓал на компанијата „REACH Air Medical Services“ со седиште во Сакраменто, Калифорнија. Станува збор за модел „Eurocopter EC 135 P2“. Компанијата потврди дека е запознаена со несреќата и дека соработува со службите за итни случаи и со надлежните органи.

„Во моментов собираме информации и соработуваме со службите за итни случаи и со соодветните органи. Во оваа фаза не можеме да дадеме дополнителни детали. Ќе објавиме повеќе информации штом станат достапни. Наш приоритет е добросостојбата на сите вклучени лица“, соопштија од компанијата.

Се очекува денеска на местото на несреќата да пристигнат истражители од Националниот одбор за безбедност на транспортот на САД (NTSB). Тие прво ќе го документираат местото на настанот, а откако леталото ќе биде извлечено од морето, ќе ги испитаат остатоците. „Истрагата штотуку започнува и во моментов располагаме со многу малку информации“, изјавија од NTSB за KTLA.