Седумнаесетгодишно момче кое шест дена било исчезнато во густа австралиска дивина е пронајдено живо, соопштија австралиските власти. Тинејџерот, идентификуван само со името Вилијам, бил пронајден во петокот наутро, по голема потрага во која учествувале полициски кучиња, нуркачи и хеликоптери, објави Би-Би-Си.
Вилијам исчезнал минатиот петок, додека бил на кампување со пријател во шумска област на околу 180 километри источно од Мелбурн, во сојузната држава Викторија. Ниските ноќни температури предизвикале сериозна загриженост за неговата безбедност, особено поради тоа што со денови бил изложен на тешки услови во дивината.
Спасувачките екипи успеале да го пронајдат во петокот наутро, по што со хеликоптер го извлекле од непристапниот терен. На местото му дале крофна и шише вода, а потоа бил пренесен во болница на лекарски преглед.
Момчето било во добра состојба. Неговата мајка, Елизабет Баркли, изјавила дека имало само неколку гребнатини и дека изгледало здраво и во добра физичка форма.
– Тој е добро, се чини дека сè е во ред, во совршена здравствена состојба – изјавила мајката.
Таа објаснила дека Вилијам останал на едно место и чекал да биде спасен.
– Само останал на едно место и чекал да го спасат. Пресреќна сум што е жив – рекла Баркли.
Со доза хумор, мајката додала дека синот „никогаш повеќе нема да ја напушти куќата“, а се пошегувала и дека е „казнет до крајот на животот“.
И полицајците не го криеле олеснувањето по успешното завршување на потрагата. Вршителот на должноста инспектор во полицијата на Викторија, Џејсон Бенбоу, изјавил дека полицајците биле емотивни кога го пронашле момчето живо.
– Ова не се случува секојпат. Сигурен сум дека наскоро ќе има приказна да ни раскаже, а ние со нетрпение очекуваме да ја слушнеме – изјавил Бенбоу.
