Француската компанија „Euro-Tech Distribution“ ги разгледува можностите за инвестирање во земјава

Француската компанија „Euro-Tech Distribution“ ги разгледува можностите за инвестирање во земјава, информираа од Дирекцијата за ТИРЗ по денешната средба на директорот Гоце Димовски  со претседници на компанијата и на белгиско-македонскиот бизнис клуб.

Како што соопштија од Дирекцијта за ТИРЗ, претставниците на компанијата како и на белгиско-македонскиот клуб покажале интерес за можностите што ги нуди Македонија како инвестициска дестинација и изразила подготвеност за понатамошна комуникација и размена на информации во насока на разгледување на конкретни можности за инвестирање и воспоставување натамошна соработка.

На средбата биле презентирани и можностите кои ги нудат технолошките индустриски развојни зони, како и поволната деловна клима во државата

- Advertisement -

Директорот Димовски истакнал дека привлекувањето квалитетни странски инвестиции останува еден од клучните приоритети на ДТИРЗ, со фокус на проекти кои создаваат додадена вредност, отвораат нови работни места и придонесуваат за одржлив економски раст.

Тој нагласил дека целта е преку партнерски однос, ефикасни институции и стабилна и предвидлива деловна средина да се создадат услови за нови инвестиции со долгорочен позитивен ефект врз македонската економија.

Euro-Tech Distribution е француска компанија специјализирана за развој, производство и дистрибуција на мали апарати и опрема за домаќинство. Со повеќе од 25 години искуство, компанијата нуди широк асортиман на производи, вклучувајќи роботски правосмукалки, роботски чистачи за базени, кујнски апарати, грејни и разладни уреди, како и производи за лична нега.

Покрај развојот на сопствени производи, компанијата обезбедува и постпродажна поддршка и дистрибуција на европските пазари, со седиште во Бондју, Франција.