(ФОТО / ГАЛЕРИЈА) Вандализам во Боровец: искршени 13 надгробни споменици, полицијата не излегува на увид
На 29 август 2026 година, во село Боровец, Струга, засега непознати лица ги вандализирале селските гробишта. Искршени се 13 надгробни споменици во кругот на црквата „Св. Богородица“.
Иако овој настан неколку пати бил пријавуван до полицијата во ОВР Струга, полициски службеници и увидна екипа на криминалистичка техника не излегуваат да извршат увид на лице место.
Мештаните се жалат на разни видови вандализам, како и на дивеење со мотори и кватроцикли низ селото без регистарски ознаки, кои притоа ги управуваат и малолетни деца, а полициски службеници нема ниту за лек.
Во село Боровец живеат Македонци и Македонци муслимани, во добри меѓуетнички и меѓурелигиски односи, кои поради непостапувањето на институциите можат сериозно да се нарушат.
Кои кривични дела се направени и зошто полицијата е должна да постапи
Според Кривичниот законик на Република Северна Македонија, уништувањето и оштетувањето на надгробни споменици повлекува кривична одговорност за кривичното дело оштетување туѓа ствар, а со оглед на бројот на оштетени споменици и организираниот карактер на дејствието, не е исклучена ниту квалификација како потешка форма на ова дело.
Дополнително, доколку со сквернавење на гробови се создава или поттикнува омраза, раздор или нетрпеливост меѓу припадниците на различни заедници, законот предвидува казна затвор од една до пет години за секој што со сквернавење на споменици или гробови ќе предизвика или разгори омраза, раздор или нетрпеливост врз национална, верска или друга дискриминаторска основа. Токму поради мешаниот етнички и верски состав на село Боровец, овој настан носи и потенцијал да прерасне во дело со дискриминаторски елемент, што дополнително го зголемува значењето на итната реакција на институциите.
Кривичните дела оштетување туѓ имот, како и делата поврзани со говор на омраза и нарушување на јавниот ред, се гонат по службена должност, што значи дека полицијата и јавното обвинителство се должни да постапат по секоја пријава, без разлика дали оштетената страна дополнително инсистира. Пропуштањето на полициски службеници да излезат на увид по повеќекратна пријава отвора прашање и за нивна можна одговорност за несовесно постапување во службата, доколку се утврди дека немало оправдана причина за одолговлекувањето.
Фото-Охридскај
ЗА НАС
ОhridSky е ваш доверлив извор за сеопфатно и избалансирано покривање на вестите. Со посветеност на интегритет и точност, обезбедуваме длабинско известување кое ги открива приказните што се најважни.
Links
© 2025 OhridSky. Сите права задржани.
