Европската Унија им нуди на САД взаемно укинување на царините за индустриски производи, изјави претседателката на Комисијата Урсула фон дер Лајен.
– Подготвени сме да преговараме со САД, понудивме нула за нула царини за индустриски стоки, како што успешно направивме со многу други трговски партнери – изјави Фон дер Лајен по состанокот со претставници на челичната и металната индустрија.
Истовремено, Комисијата е подготвена да одговори со контрамерки.
– Европа е секогаш подготвена за добар договор, затоа го оставаме на маса. Но, ние сме подготвени да одговориме со контрамерки и да ги браниме нашите интереси – додаде претседателот на Комисијата.
Американската администрација воведе царини од 25 отсто за увоз на алуминиум и челик во САД од целиот свет, кои стапија на сила на 12 март. Од 3 април, тарифите се исто така 25 отсто за сите автомобили и автоделови што не се произведени во САД.
На 2 април американскиот претседател Доналд Трамп објави трговска војна на целата планета и најави реципрочни царини, минимум 10 отсто за сите, а уште повисоки царини за околу 60 земји, кои ќе стапат на сила од среда, на 9 април. Тој ги „пресече“ царините на 20 отсто за Европската Унија, на 34 отсто за Кина.
Европската комисија ги анализира можните одговори и се консултира со земјите членки, а првиот одговор треба да следи во среда.
Комесарот за трговија, Марош Шефчовиќ, во Луксембург, каде министрите за трговија на земјите-членки разговараа за трговските односи со САД, изјави дека Комисијата подготвила список со предложени контрамерки кои денеска ќе бидат испратени до земјите-членки.
– Гласањето е закажано за среда, на 9 април, а контрамерките треба да се применат од 15 април – рече Шефчовиќ.
