Европската комисија го осудува насилството на протестите во Албанија

Европската комисија го осуди насилството во Тирана и во други албански градови – вклучително и случаи на подметнување пожари, напади врз државни институции и уништување на јавен и приватен имот – наведувајќи дека, иако правото на протест мора да биде заштитено, одговорните за насилството мора да сносат одговорност во согласност со законот.

„Во демократското општество нема место за насилство, а одговорот на него мора да биде законски и пропорционален“, соопшти Европската комисија.

Во соопштението се нагласува дека слободата на собирање и слободата на изразување се основни права и клучни европски вредности, кои мора да се почитуваат и остваруваат на мирен начин.

- Advertisement -

Европската комисија ја поздрави посветеноста на албанските власти да го заштитат правото на граѓаните на протест, нагласувајќи дека незадоволството треба да се решава преку конструктивен дијалог, а не преку насилство.

„Во земја-кандидат која е цврсто посветена на процесот на пристапување кон Европската унија и постигнува значителен напредок на својот европски пат, незадоволството треба да се решава преку конструктивен дијалог и на мирен начин“, се вели во соопштението.

Комисијата дополнително наведе дека сите одговорни за насилството треба да сносат одговорност преку соодветна правна постапка.