Едно лице загина во тешка сообраќајна несреќа што попладнево се случи на патниот правец Прилеп – Градско, кај превојот Плетвар

Едно лице загина во тешка сообраќајна несреќа што попладнево се случи на патниот правец Прилеп – Градско, кај превојот Плетвар, кога товарно моторно возило излетало од коловозот, потврдија од СВР Битола.

Несреќата била пријавена во 17:44 часот, по што полициски екипи веднаш излегле на местото на настанот и започнале увид за утврдување на причините и околностите под кои дошло до трагедијата.

„Денеска (26.06.2026) во 17.44 часот во СВР Битола било пријавено дека на патниот правец Прилеп–Градско, превој Плетвар, во близина на село Ореовец, товарно моторно возило излетало од патот при што едно лице починало. Увидот е во тек“, информираат од СВР Битола.

- Advertisement -

Во првичната информација од полицијата не се наведува дали загинатото лице е возачот на товарното возило.

Поради несреќата, сообраќајот на овој патен правец првично беше целосно запрен. Од Јавното претпријатие „Македонија пат“ соопштија дека прекинот започнал во 17:55 часот, бидејќи превртениот камион и песокот што се истурил од приколката целосно го блокирале коловозот.

Од 19:30 часот, сообраќајот повторно е воспоставен, но се одвива наизменично по една коловозна лента.