ДОКУМЕНТАРЕЦОТ ЗА НОВАК ЃОКОВИЌ ОТКРИВА МНОГУ ДЕТАЛИ ОД ЖИВОТОТ НА ШАМПИОНОТ

Новак Ѓоковиќ наскоро ќе ја раскаже својата приказна на начин на кој досега публиката не го видела. Документарниот филм „Novak Djokovic: The Wolf in Winter“ ќе биде достапен од 20 август ексклузивно на Prime Video, во повеќе од 240 земји. Филмот го режираше Џејсон Хехир, режисерот на познатата документарна серија „The Last Dance“ за Мајкл Џордан, а во него Ѓоковиќ зборува за моментите зад сцената, сомнежите, жртвите и постојаната борба да стане подобар.

Филмот не се занимава само со неговите титули и рекорди. Приказната се враќа во детството на Ѓоковиќ во Србија, во период обележан со војна и финансиски тешкотии. Неговото семејство направило големи жртви за да му овозможи да тренира и да продолжи по тенискиот пат, а документарецот покажува како токму тие околности го обликувале неговиот карактер и менталитет.

Еден од најинтересните делови е тоа што Ѓоковиќ не е претставен само како непобедлив шампион, туку и како човек кој имал сомнежи и тешки моменти. Во филмот има ексклузивни снимки од неговите подготовки, тренинзи и настапи на големите турнири, но и мирни моменти поминати со семејството. За првпат гледачите треба да добијат поинтимен увид во начинот на кој тенисерот се подготвува физички и психички додека и понатаму се натпреварува на највисоко ниво.

- Advertisement -

Посебно место има и неговото семејство. Во документарецот учествува неговата сопруга Јелена Ѓоковиќ, која зборува за човекот зад спортската ѕвезда. Неодамна се одржа промоција на филмот, каде Јелена привлече големо внимание со елегантното издание. Покрај неа, во филмот зборуваат и големи имиња од тенисот – Рафаел Надал, Андре Агаси, Пит Сампрас, Борис Бекер и Џим Куриер.

Интересно е што документарецот за Ѓоковиќ пристигнува додека неговата кариера сè уште трае. За разлика од некои спортски документарци кои се прават откако големите шампиони ќе се повлечат, оваа приказна го следи Ѓоковиќ во момент кога тој и понатаму се натпреварува против многу помлади тенисери. Токму тоа му дава посебна тежина на филмот – гледачите не гледаат само ретроспектива, туку спортист кој сè уште се обидува да го помести сопствениот лимит.

– Тенисот ми даде многу, но најголемите битки никогаш не се водеа само на теренот – вели Ѓоковиќ во најавата за документарецот, објаснувајќи дека сака публиката да ги види и моментите кои обично остануваат скриени.

– Патувањето беше неверојатно, но сè уште не е завршено – порача тој.

Насловот „The Wolf in Winter“ – „Волкот во зима“ – така добива симболично значење: приказна за шампион кој, и покрај годините и новата генерација ривали, сè уште не се откажува од борбата.

 

View this post on Instagram

 

A post shared by Novak Djokovic (@djokernole)

По промоцијата на документарецот во Њујорк, во Музејот на модерна уметност (MoMA), каде што Ѓоковиќ се појави со екипата на филмот на 17 јули, сега филмот имаше свое претставување и во регионот. Поточно, во ресторанот Forza Kuk, кој се наоѓа на станицата на жичарницата Котор–Ловќен, Ноле прослави за документарецот со околу 200 гости.

Тој на социјалните мрежи напиша: „Last night, on the mountain, winter landed in summer“ (Синоќа, на планината, зимата пристигна среде лето).

На оваа промоција освен сопругата на Ноле, Јелена Ѓоковиќ, беше и неговото семејство, како и голем број пријатели, а се изигра и српско оро.