ДИЈАНА И МАЈКА Ѝ НЕ ЗБОРУВАЛЕ ЧЕТИРИ МЕСЕЦИ ПРЕД НЕЈЗИНАТА СМРТ

Односот меѓу принцезата Дијана и нејзината мајка Франсис Шанд Кид бил исполнет со љубов, но и со длабоки рани, кавги и периоди на молк. Двете никогаш целосно не успеале да ги надминат последиците од настаните од детството на Дијана, а последните четири месеци од животот на принцезата не разговарале.

Франсис се омажила за таткото на Дијана, Џон Спенсер, во 1954 година, кога имала само 18 години. Бракот завршил со развод, а во 1967 година Франсис го напуштила семејството откако се вљубила во Питер Шанд Кид. Следувала тешка битка за старателството, во која дури и мајката на Франсис сведочела против неа. Старателството на крајот му припаднало на таткото на Дијана, која тогаш имала шест години.

Иако подоцна Дијана го доживувала заминувањето на мајка ѝ како една од најголемите трауми од детството, Франсис не исчезнала целосно од нејзиниот живот. Се слушале по телефон, се посетувале и Дијана и нејзиниот брат го поминувале времето со двајцата родители. Нивниот однос се менувал низ годините, а Дијана често била заштитнички настроена кон мајка си. Тие повторно се зближиле и биле фотографирани заедно, меѓу другото, на Вимблдон во 1993 година.

- Advertisement -

Последниот голем конфликт се случил во 1997 година, по интервјуто на Франсис за „Hello!“. Таа зборувала за животот на својата ќерка по разводот и изјавила дека е добро што Дијана ја изгубила титулата бидејќи така конечно можела да биде своја и да го користи своето име. Дијана, според повеќе извори, тоа го доживеала како навреда и предавство. Франсис подоцна се обидувала да стапи во контакт, но писмата ѝ биле враќани неотворени.

Подоцна се појавила и друга верзија за причината за нивната последна кавга. Поранешниот батлер на Дијана, Пол Бурел тврдел дека во еден од последните телефонски разговори Франсис била лута поради љубовните врски на ќерка ѝ со муслимани, меѓу кои и пакистанскиот кардиохирург Хаснат Кан. Франсис го негирала тоа и вистинската причина за последната расправија никогаш не била целосно разјаснета. Она што е потврдено е дека кога Дијана загинала во сообраќајната несреќа во Париз на 31 август 1997 година, мајка ѝ и таа сè уште не разговарале.