„Будење“ го затвора Танц Фест со 30 танчери

Интернационалниот фестивал Танц Фест 2026 ќе го затвори своето овогодинешно издание на 5 мај во Народен театар Битола, со премиерна изведба на претставата „Будење“ на кореографката Рисима Рисимкин.

Станува збор за впечатлива сценска продукција во која настапуваат 30 танчери, а влезот за публиката е бесплатен.

Пред почетокот на претставата ќе биде доделена специјалната награда „Менада“ за поддршка на современиот танц на градоначалникот на Битола, Тони Коњановски.

- Advertisement -

Затворањето на фестивалот со настан надвор од Скопје симболизира нов правец во развојот на фестивалот – проширување кон нови сцени и публика низ земјата.

Претставата „Будење“ носи силна сценска енергија и се занимава со теми како меѓучовечките односи, стереотипите и судирот меѓу индивидуалниот и колективниот идентитет. Преку движење и телесен израз, танчерите ги отвораат прашањата за општествените норми, личните позиции и трансформацијата на човекот во современото општество.

Музиката за претставата ја потпишува Тони Китановски, костимите се дело на Благој Мицевски, а сценскиот дизајн го изработи Матеа Мијановиќ.

Фестивалот е поддржан од Министерство за култура и туризам, Општина Битола, како и од повеќе партнери од приватниот сектор: Виталија, Божиновски часовници и накит & Божиновски Фондација, Државна видеолотарија на Македонија, Бовин, Витамини.мк, Делфино мобилити груп со Geely, Lynk & Co и Sixt., Yeppeuda, СИД Камп.