Бројот на стипендии не се намалува, ниту партиципацијата во студентските домови се зголемува, напротив студентите ќе добијат реновирани домови и мотивирачки стипендии

Бројот на стипендии не се намалува, ниту партиципацијата во студентските домови се зголемува, напротив студентите ќе добијат реновирани домови и мотивирачки стипендии – изјави на денешната прес-конференција Тодор Конески, член на ИК на УМС на ВМРО-ДПМНЕ.

Конески го обвини СДСМ дека продолжува со своите лаги и манипулации.

– Откако седум години на власт не направија ништо за студенти и не исполнија ниту едно ветување, сега кога студентите имаат партнер во Владата, манипулираат дека стипендиите се намалени. Такво нешто нема. Стипендиите не се намалени со Законот за студентскиот стандард, бројот на стипендиите не е дел од законското решение, туку истите се носат на годишно ниво, согласно Буџетот и согласно потребите на државата – рече Конески.

- Advertisement -

Според него, предложено е подобро прераспределување на стипендиите во рамките на квотата од 100%, за да им се излезе во пресрет на студентите и за да има стипендии кои се базираат на успех, на потребите на државата и на пазарот на трудот.

– Тоа што остануваат недоделени стипендии, се должи на позитивна статистика во последните 5 години, што значи дека квотата за социјални стипендии не се исполнува, односно истите не се доделуваат во бројот кој е предвиден. А од друга страна пак, кога квотата од една група не се исполнува, таа не може да се прелее во друга група.

Измената на законот дава подлога за јасна дистинкција меѓу видовите на стипендии, за кои потоа на годишно ниво, врз основа на Програмата за развој и унапредување на студентскиот стандард и конкурсите, ќе се утврдуваат бројот на стипендии по вид и износот на стипендијата за секој посебен вид и категорија. Затоа што, стипендиите кои се доделуваа до сега беа особено конфузни и со ист месечен износ, не се знаеше кои стипендии се за висок просек, а кои се мотивирачки за стратешки области – рече Конски.

Тој го обвини СДСМ дека лаже и за сместувањето во домовите, затоа што никаде во Предлог законот не е наведена партиципацијата која ќе ја плаќаат студентите, за да се прејудицира дека ќе биде поголема од постојаната.

– И партиципацијата, исто како и стипендиите се утврдува на годишно ниво со Програмата. Од друга страна, Министерството работи на ново законско решение со кое ќе ги преземе платите на вработените во студентските домови, за да се намали товарот врз партиципацијата која ја плаќаат студентите, а од која се финансираат платите на вработените во студентските домови.

Најважно од се, е што летово ќе започне реконструкција на сите студентски домови, кои по нивното завршување ќе бидат енергетски ефикасни, со подобрен комфор и најсовремена опрема и уредување. Владата останува посветена во подобрувањето на студентскиот стандард и условите во кои живеат студентите, учат и се развиваат. По целосната реконструкција на сите студентски домови, студентите ќе имаат современи услови на живеење и академско надградување – рече Конески од Унијата на млади сили на ВМРО-ДПМНЕ.