Британскиот парламент во вторник усвои закон со кој ќе се забрани продажбата на цигари на лица под 17 години

Британскиот парламент во вторник усвои закон со кој ќе се забрани продажбата на цигари на лица под 17 години. Целта е да се спречи секое лице родено по 1 јануари 2009 година да почне да пуши и да се создаде „генерација без тутун“, објавува француската новинска агенција АФП. Владата го поздрави усвојувањето на законот како историски момент за здравјето на нацијата.

Министерот за здравство Вес Стритинг го поздрави усвојувањето на законот во двата дома на парламентот како „историски момент за здравјето на нацијата“ што ќе доведе до „првата генерација без тутун, заштитена од доживотна зависност и неговите штетни ефекти“.

Откако законот ќе добие кралска согласност и ќе стапи во сила, тој ќе ѝ овозможи на владата да ја прошири забраната за пушење во затворен простор на отворени простори како што се игралишта и области надвор од училиштата и болниците.

- Advertisement -

Исто така, ќе ѝ овозможи на владата да ги ограничи вкусовите и пакувањето на електронските цигари и да ја забрани употребата на електронски цигари на места каде што пушењето е веќе забрането.

Законот е дел од напорите за зајакнување на превентивните здравствени мерки и намалување на долгорочниот притисок врз британската НХС.

„Револутивен пресврт за јавното здравје“

Хејзел Чизман, директорка на добротворната организација за јавно здравје „Акција за пушење и здравје“ (ASH), го поздрави законот како „револуционерен пресврт за јавното здравје“ и „траен подарок за идните генерации“.

Лабуристичката влада на Кир Стармер воведе забрана за продажба на електронски цигари за еднократна употреба во јуни минатата година, кои се евтини и доаѓаат во шарено пакување, што ги прави популарни кај младите луѓе.

Нов Зеланд стана првата земја во светот во 2022 година што ја забрани продажбата на цигари на секој роден по 2008 година. Сепак, новоизбраната конзервативна коалициска влада го укина законот во ноември 2023 година, помалку од една година откако беше воведен.

Малдивите ја забранија продажбата на цигари на секој роден по 1 јануари 2007 година во ноември минатата година.

Според Националната здравствена служба (NHS), околу 75.000 луѓе умираат од пушење во Англија секоја година, а се смета дека пушењето е одговорно и за околу една четвртина од сите смртни случаи од рак.