Сопругата на Рајан Рејнолдс, актерката Блејк Лајвли, го обвини својот колега во филмот „Тука завршува со нас“ (It ends with us) за сексуално вознемирување, а сега Џастин Балдони одлучи да го тужи „Њујорк тајмс“ за написот во кој беа објавени нејзините тврдења.
Балдони покрена тужба за клевета, тврдејќи дека објавиле напис „полн со невистини, лажно претставување и пропусти“ кој се потпира на наративот на Блејк Лајвли. Тој бара отштета од 250 милиони, пишува „Си-ен-ен“.
Блејк Лајвли поднесе тужба за сексуално вознемирување против Џастин Балдони во декември. Актерката во тужбата тврдела дека откако на сетот на „I Ends With Us“ искажала загриженост за сексуално вознемирување, Балдони и неговиот тим возвратиле со објавување на непријатни написи во медиумите за да ја уништат нејзината репутација. „Њујорк тајмс“ беше првиот што пишуваше за тоа, објавувајќи статија со наслов „Можеме да закопаме секого: внатре во холивудската машина за срамотење“. Написот од 4.000 зборови содржеше содржина од тужбата на Блејк Лајвли, која обично останува доверлива.
По тој напис и обвинувањата на актерката, агенцијата за таленти ВМЕ, која исто така ги застапува Блејк и нејзиниот сопруг Рајан Рејнолдс, се откажа да го застапува Балдони. Попатно, американската актерка доби поддршка низ Холивуд, вклучително и од синдикатот на актерите.
Џастин Балдони сега тврди дека актерката дала лажни тврдења за сексуално вознемирување со цел да ја добие контролата врз филмот, а потоа започнала кампања за „преобликување на нејзиниот јавен имиџ“.
„Нејзината цинична злоупотреба на наводите за сексуално вознемирување за да воспостави унилатерална контрола врз секој аспект од продукцијата беше и стратешка и манипулативна“, се вели во тужбата на Балдони.
Се додава дека Блејк Лајвли сакала да го оттргне вниманието од нејзиниот негативен имиџ и дека сè е само изговор и тактика.
Во тужбата се тврди дека „Њујорк тајмс“ го прекршил својот новинарски интегритет во проверувањето на нејзините обвинувања за сексуално вознемирување. Стои напомена дека медиумот „речиси целосно се потпира на непроверениот и себичен наратив на актерката“ и дека се занемарени доказите што ќе ги разоткријат нејзините вистински мотиви.
Портпаролката на „Њујорк тајмс“ изјави за „Си-ен-ен“ дека публикацијата планира „енергично да се брани од тужбата“.
