„Безбеден град“ доби поддршка од Мицкоски кој повика системот да се прошири низ државата

Системот „Безбеден град“, кој од вчера е ставен во функција и во декември испраќа само опомени, а од јануари ќе почне да казнува, доби силна поддршка од премиерот Христијан Мицкоски. Тој истакна дека очекува системот да се прошири на целата територија на државата.

Премиерот беше дециден дека Владата е подготвена да се соочи со политички последици, доколку тоа значи спасување човечки животи.

– Го поддржувам „Безбеден град“ и поддржувам да се прошири на цела Македонија. Подготвени сме да го издржиме и политичкиот удар, само да спасиме некој човечки живот – изјави Мицкоски, додавајќи дека само во последните две недели во строгиот центар на Скопје загинале три лица.

- Advertisement -

Тој нагласи дека дел од прекршоците што системот ги регистрирал за само еден ден се особено загрижувачки — возење нерегистрирани возила, поминување на црвено и други опасни ситуации.

– Ако спасиме барем еден живот, јас сум подготвен да понесам политичка одговорност. Овие животи се губат поради непочитување на правила, а тоа е катастрофа – додаде премиерот.

Министерството за внатрешни работи и Владата, според него, остануваат решени да ги спроведат сите мерки за поголема безбедност на улиците.