БЕБЕ-ГОДИНАЧЕ ПРЕЖИВЕА 24 ЧАСА ЗАКОПАНО ВО ДУПКА!

Бебе на возраст од 11 месеци е пронајдено живо во плитка дупка во шума во американската сојузна држава Јужна Каролина, откако, според проценките на полицијата, минало приближно 24 часа закопано во кафез за кучиња, завиткано во пешкир.

Бебето, по име Коа Шарп, исчезнало во понеделникот, 9 ноември, откако било оставено на чување кај својот 25-годишен татко Мајкл Комер. Според полицијата, мајката извршувала обврски, а кога пристигнал друг човек кој требало да го преземе чувањето на детето, таткото и бебето веќе ги немало.

Откако семејството го пријавило исчезнувањето, била организирана опсежна потрага во која учествувале околу 100 луѓе, меѓу кои полицајци, пожарникари и припадници на други спасувачки служби. Во акцијата се вклучиле и агенти на ФБИ, федералната агенција АТФ и службата за спроведување на законот на Јужна Каролина.

- Advertisement -

Полицијата го пронашла Мајкл Комер во понеделникот вечерта, во помошен објект во областа Бејтсбург-Лисвил. Тој бил уапсен под сомнение за провала и спротивставување при апсење, но детето не било со него.

Истрагата покажала дека Комер во текот на денот се движел на повеќе локации во округот Лексингтон, иако немал сопствено возило. Полицијата проверувала информации и видеоснимки од неговото движење, додека потрагата по бебето продолжила.

Одлучувачкиот момент се случил во вторникот попладне, кога потрагата се проширила во шумата во близина на куќата на таткото на Комер, односно дедото на бебето. На околу 45 метри од куќата, спасувачите забележале свежо раскопана земја и борови гранки.

Кога почнале да копаат, го слушнале плачот на детето. Под земјата откриле жичен кафез за кучиња, со димензии околу 60 на 60 сантиметри, во кој било сместено бебето. Кафезот бил завиткан во пешкир и плитко закопан.

– Пред само неколку моменти го пронајдовме малиот Коа, жив закопан, на работ на животот, како плаче. Тоа беше најрадосниот звук што можете да го слушнете – изјави шерифот Џеј Кун на прес-конференција.

Според неговата проценка, пешкирот со кој бил завиткан кафезот најверојатно создал воздушен простор што му овозможил на бебето да преживее околу 24 часа под земјата. Бебето веднаш било извлечено и пренесено во болница, каде што добило медицинска помош, но засега не се објавени подетални медицински податоци за неговата состојба.

Засега не е расчистено кој го закопал бебето, дали таткото или човекот што го презел на чување, ниту мотивот за таквиот чин.