Барањата не се од работен однос, а е скокната и фазата на мирно решавање на спорот

Генералниот штрајк во М-НАВ е привремено забранет, откако денеска Основниот граѓански суд во Скопје го усвои предлогот на М-НАВ АД Скопје за изрекување на привремена мерка – забрана, соопшти  М-НАВ.

Генералниот штрајк го најавија Струковиот синдикат на контролори на летање ССКЛ-подружница на Независниот синдикат на работниците од сообраќајот и врските на РСМ Скопје со образложение дека не се исполнети барањата од претходниот штрајк и ветувањата дека тоа ќе се направи.

„Со оваа Одлука, Судот утврди дека најавениот штрајк е спротивен на законските одредби бидејќи не била спроведена постапката за мирно решавање на колективните спорови, како и дека штрајкот не произлегува од конкретни барања од работен однос. М-НАВ АД Скопје го поздравува решението на Судот и ја нагласува својата определба за почитување на законитоста, континуирано обезбедување на безбедност и непречено функционирање на воздушниот сообраќај во Република Северна Македонија“, наведе во соопштението М-НАВ.

- Advertisement -

Штрајкот беше најавен за 20 октомври во периодот од 10 до 15 часот, со затворање на македонскиот воздушен простор.