АВИОН НА „ПЕГАСУС ЕРЛАЈНС“ ЗА МАЛКУ ЌЕ ПОЛЕТАШЕ ВО ПОГРЕШНА НАСОКА

Патнички авион на „Пегасус ерлајнс“ се обиде да полета во погрешна насока на аеродромот во Франкфурт минатата недела. Германската контрола на летање го опиша како исклучително редок инцидент.

– Авионот „Ербас А321“, кој леташе за Истанбул, влезе на пистата во погрешна насока во вторник, но потоа го прекина полетувањето со релативно мала брзина од 65 километри на час – потврди портпаролот на германската контрола на летање (DFS) во недела.

Портпаролот ја опиша грешката на пилотот на турскиот нискобуџетен превозник како „навистина извонредна“.

- Advertisement -

– Тоа не се случува често, особено не во Германија – рече тој.

На авионот му беше дозволено да полета кон југ од пистата 18 на најпрометниот аеродром во Германија. Наместо тоа, откако влезе на пистата преку одредената точка за пристап, авионот почна да се движи кон север, објави „Авиејшн Хералд“.

– Контролорите на летање „очигледно веднаш го забележаа тоа“ и им рекоа на пилотите да ја напуштат пистата – рече портпаролот на DFS.

Тој нагласи дека нема непосредна опасност бидејќи ситуацијата е ставена под контрола навремено.

Германската контрола на летање го пријавила инцидентот во германската Федерална канцеларија за истрага на воздухопловни несреќи (BFU).

Операторот на аеродромот во Франкфурт, Фрапорт, исто така потврди дека во вторник се случил „инцидент“, но не даде дополнителни детали.

Според порталот The Aviation Herald, седум минути подоцна авионот полетал без никакви проблеми во правилната насока, кон југ.