Американската ковница ќе пушти во оптек серија пригодни монети од еден долар со ликот на претседателот на САД, Доналд Трамп, по повод 250-годишнината од основањето на Соединетите Американски Држави

Американската ковница ќе пушти во оптек серија пригодни монети од еден долар со ликот на претседателот на САД, Доналд Трамп, по повод 250-годишнината од основањето на Соединетите Американски Држави, соопшти американскиот министер за финансии Скот Бесент.

На предната страна од монетите ќе биде прикажан ликот на Трамп, заедно со натписите „Liberty“, „In God We Trust“ и „1776–2026“, додека на задната страна ќе се наоѓа белоглавиот орел од претседателскиот печат.

– Ми дадоа монета. Колку што знам, тоа е многу невообичаено – изјави Трамп во интервју за Фокс Бизнис, додавајќи дека за него е голема чест што неговиот лик ќе се најде на американска монета.

- Advertisement -

Најавата веднаш предизвика критики и отвори правни дилеми поради законските ограничувања за прикажување живи личности на американските пари. Дел од критичарите се повикаа на закон од 1866 година, кој се однесува на банкнотите, додека монетите се произведуваат од Американската ковница.

Во 2020 година, Конгресот усвои закон со кој му овозможи на Министерството за финансии да издаде пригодни монети од еден долар по повод 250-годишнината од основањето на САД, но во него е наведено дека на тие монети не смее да биде прикажана жива личност.

Министерот Бесент, сепак, смета дека постои преседан. Тој посочи дека претседателот Калвин Кулиџ бил прикажан на пригодна монета издадена по повод 150-годишнината од основањето на Соединетите Американски Држави.

– Како министер за финансии, имам само два услови: парите мора некаде да ги содржат зборовите „In God We Trust“ (Во Бога веруваме) и на нив не смее да има лик на жива личност. Сепак, за 150-годишнината беше издадена монета со ликот на Калвин Кулиџ, така што постои преседан за прикажување жива личност на монета – изјави Бесент.

Одлуката веќе предизвика политички и правни дебати во САД, а останува да се види дали издавањето на монетата ќе се соочи со правни предизвици или ќе биде реализирано според најавите.