АКТИВИСТИТЕ КИДНАПИРАНИ ОД ИЗРАЕЛ ПРЕФРЛЕНИ ВО ГРЦИЈА

Најмалку 176 активисти од глобалната флотила „Сумуд“, која носеше хуманитарна помош за Газа, но беше заробена од израелската морнарица, безбедно пристигнаа на Крит и прифатени се од грчката држава, јави дописничката на МИА од Атина.

– Под исклучително тешки услови, грчката држава одговорно ја презеде хуманитарната задача за прием на учесниците во „Глобал сумуд флотила“, со единствена грижа за нивната безбедност и заштита – соопшти Министерството за надворешни работи на Грција.

Според грчкото МНР, станува збор за државјани на Европската Унија и на трети земји, кои во петокот безбедно пристигнаа на пристаниште во регионот Ласити на Крит, а 31 лице било пренесено во болница за укажување прва помош. Останатите 145 лица, со одговорност на нивните конзуларни претставништва постепено заминуваат од Грција преку аеродромот во Ираклио на Крит.

- Advertisement -

Постоела континуирана комуникација со странски дипломатски претставништва во Грција и надлежните европски институции, а грчкиот министер за надворешни работи разговарал со своите колеги, кои ѝ се заблагодариле на Грција за преземањето на оваа иницијатива.

По израелското пресретнувањето на бродовите од глобалната флотила „Сумуд“, Грција ја презеде одговорноста да ги прими на своја територија членовите на флотилата и да се погрижи за безбедно да бидат вратени во нивните земји. Грција истовремено побара од Израел да ги повлече своите бродови од областа каде што беше флотилата „Сумуд“.