Претседателот Трамп сака да „се позанимава со Куба“ пред да му заврши мандатот

Американскиот претседател Доналд Трамп во четвртокот изјави дека сака да „се позанимава со Куба“ пред да му заврши мандатот и дека неговата администрација „многу внимателно ја следи ситуацијата“. Неговиот втор претседателски мандат треба да заврши во јануари 2029 година.

„Сакам да се позанимавам со Куба пред да си заминам“, рече тој во интервју за „Салем њуз“ (Salem News), одговарајќи на новинарско прашање дали размислува за „ослободување на Куба“ преку кратка воена операција. „Многу внимателно ја следиме ситуацијата. Таму состојбата е многу лоша. Тоа е, во суштина, пропаднато место – нација, или како и да сакате да го наречете“, забележа американскиот претседател во врска со Куба.

Трамп и претходно најавуваше намера да доведе до промена на власта во Куба – цел која, според извештаите, неговата администрација планирала да ја оствари по завршувањето на војната со Иран.

- Advertisement -

Во меѓувреме, Вашингтон го засилува економскиот, политичкиот и правниот притисок врз комунистичките власти во Хавана. Од враќањето на Трамп во Белата куќа, низа санкции дополнително и драстично ја влошија долготрајната економска, енергетска и хуманитарна криза во оваа карипска нација со 9,4 милиони жители.