ШПАНИЈА ДОНЕСЕ МЕРКИ ПРОТИВ КРИЗАТА СО ДОМУВАЊЕТО И СКАПИТЕ СТАНОВИ

Шпанскиот Конгрес на пратениците денеска одобри пакет мерки за ублажување на кризата со домувањето, која предизвикува сè поголемо незадоволство кај граѓаните. Одлуката беше донесена само еден ден по генералниот штрајк и масовните улични протести низ Шпанија, на кои демонстрантите побараа итна реакција на властите поради високите цени на становите и кириите.

Мерките имаат цел да ги ограничат присилните иселувања и шпекулациите со недвижниот имот.

Кризата со домувањето во Шпанија стана едно од најсериозните социјални и економски прашања, особено во големите градови, каде што трошоците за изнајмување и за купување недвижности значително го надминуваат финансискиот капацитет на голем дел од населението. Младите, семејствата со ниски и средни приходи и работниците се меѓу најпогодените категории, кои сè потешко успеваат да обезбедат пристојно и достапно живеалиште.

- Advertisement -

Протестите и генералниот штрајк го засилија политичкиот притисок врз институциите, при што демонстрантите бараат конкретни решенија за ограничување на трошоците за домување и за подобрување на пристапот до станови. Одобрувањето на мерките во парламентот претставува обид на властите да одговорат на растечкото незадоволство, но останува прашањето дали тие ќе дадат резултати и ќе ја намалат финансиската тежина што ја носат граѓаните.

Главната опозициска партија, конзервативната Народна партија (ПП) соопшти дека ако дојде на власт ќе ги укине мерките воведени од левичарската влада. ПП најави дека ќе обезбеди изградба на еден милион нови станбени единици, а истовремено ќе ги намали даноците и ќе ги отстрани бирократските пречки за развој на пазарот на недвижности.

Кризата со домувањето во Шпанија во последните години прерасна во поширок проблем, кој ги засега не само станарите туку и економската стабилност, социјалната сигурност и демографските перспективи на земјата.

Генералниот штрајк во Шпанија синоќа заврши со насилни инциденти во повеќе градови, во кои се приведени најмалку 75 лица.