Украина зароби Индонезиец во руските редови

Украина соопшти дека за првпат заробила државјанин на Индонезија кој се борел на страната на Русија во војната.

Станува збор за 49-годишен маж од индонезискиот остров Јава, кој бил испратен во украинската Запорошка област за да учествува во руски напад. Според информациите на украинскиот државен проект „Хочу жить“ („Сакам да живеам“), тој успеал да стигне до територија под украинска контрола откако групата во која се наоѓал била нападната со дронови. Таму го заробиле украинските сили.

Според податоците на овој проект, во првите девет месеци од годинава Русија регрутирала околу 283 државјани на Индонезија за учество во војната против Украина. Во претходните три години, тврдат од проектот, биле регрутирани најмногу десетмина.

- Advertisement -

Руската амбасада во Џакарта веднаш не одговорила на прашањата за наводното регрутирање индонезиски државјани. Сепак, ова не е првпат Русија да се обидува да ангажира странски платеници за војната во Украина.

Кениските разузнавачки служби во февруари соопштија дека повеќе од илјада Кенијци биле намамени во Русија за да учествуваат во борбите.

Сè поголем број луѓе од африкански држави, меѓу кои Кенија, Уганда и Јужноафриканската Република, но и од други делови на светот, завршуваат на боиштата откако ќе бидат привлечени од понуди за работа во Русија. Москва на тој начин настојува да обезбеди дополнителна жива сила за продолжување на војната, која трае повеќе од четири години.

Индонезиските власти овој месец ја повикаа Москва да преземе мерки со кои ќе се спречи регрутирање нивни државјани во руската армија. Барањето следуваше откако беше објавено дека во октомври загинал Индонезиец кој служел во руските вооружени сили.

Портпаролката на индонезиското Министерство за надворешни работи, Ивона Мевенгканг, потврди дека нејзината влада побарала од Русија да преземе конкретни мерки.

– Индонезиската влада побара од руската влада да ги преземе сите неопходни чекори за да обезбеди ниту еден Индонезиец да не биде регрутиран во руската армија или на која било друга воена позиција во Русија – изјави Мевенгканг.

Таа додаде дека индонезиските власти се особено загрижени поради начините на регрутирање што би можеле да претставуваат трговија со луѓе.

Само неколку дена подоцна, индонезиската полиција соопшти дека идентификувала криминална мрежа за трговија со луѓе, која ги таргетирала државјаните на Индонезија. За пронаоѓање жртви, членовите на мрежата користеле социјални мрежи и апликации за размена на пораки.

Според полицијата, во огласите биле нудени добро платени работни места во логистиката, обезбедувањето на границите и изградбата на одбранбена инфраструктура. Меѓутоа, по пристигнувањето во Русија, кандидатите биле упатувани да потпишат договори за служба како платеници, а некои од нив потоа биле испраќани во воени зони, соопшти полицијата.