Сомалиското пиратство повторно зема замав на поморскиот пат меѓу Европа и Азија

Сомалиското пиратство повторно зема замав на поморскиот пат меѓу Европа и Азија. По години во кои нападите се намалуваа, вооружени групи повторно преземаат танкери и држат морнари во заложништво.

Еден од киднапираните бродови, танкерот „Асана“, сè уште бил под контрола на пиратите на 16 октомври, објави Асошиејтед прес.

Меѓународната поморска организација претходно истиот месец соопштила дека на танкерот има 22 заложници. Бродот пловел под знамето на Танзанија, додека пиратите го заплениле во јули. Другите 5 трговски брода што ги евидентирала агенцијата подоцна биле ослободени.

- Advertisement -

Меѓу групите што запленувале танкери има пирати со база во Пунтланд, полуавтономен регион во Сомалија. Напади имало и крај брегот на Јемен, по што пиратите ги одвлекувале бродовите кон Сомалија. Пред 15 години, при претходниот голем бран киднапирања, сомалиските пирати барале милионски откупи.

Ослободувањето на бродовите може да биде опасно и за заложниците. Петмина членови на екипажот загинале во септември при операцијата за враќање на танкерот „Хонор 25“, кој пиратите го држеле од април. Според Меѓународната поморска организација, од тој и од уште 2 танкера биле ослободени вкупно 44 морнари.

Поморските команданти ја поврзуваат обновата на пиратството со нестабилноста што ја создаваат војните во регионот. Нападите на јеменските Хути врз бродови, кои почнаа во ноември 2023 година, имаат политички мотив поврзан со војната во Газа.

– Не велам дека има директна врска со оваа криза, но можам да кажам дека една криза раѓа друга – изјавил португалскиот комодор Жозе Родригеш Педра, командант на поморската мисија „Аталанта“ на море.

Фрегатата „Санта Марија“ ја предводи мисијата на Европската Унија во Аденскиот Залив и во водите крај Сомалија. На бродот има повеќе од 200 членови на екипажот. За надзор на водите користат хеликоптер и дрон.

Околу 80 километри северно од местото каде што новинарот на АП се качил на фрегатата се наоѓа теснецот Баб ел Мандеб. Во мирнодопски услови, низ него минува околу една четвртина од светскиот контејнерски сообраќај.