Младиот музичар Си-Џеј Бич загина само неколку часа по настапот

Си-Џеј Бич (CJ Beach), 22-годишен музичар од Талахаси, загинал кога автомобилот што го управувал излетал од патот Рехвинкел во округот Вакула и удрил во неколку дрвја. Несреќата се случила околу 1.15 часот по полноќ, во близина на Крафордсвил. Според извештајот на сообраќајната полиција на Флорида, младиот возач не бил врзан со безбедносен појас и бил прогласен за мртов на местото на несреќата. Истрагата е во тек, а официјалните служби засега не ја соопштиле причината поради која автомобилот излетал од патот.

Само неколку часа претходно, во петокот вечерта, Бич настапувал во локалот „The Salty Donkey“ во Панасеа. Неговиот пријател Тоби ВанЕселстајн се потсетил на последните заеднички моменти – се дружеле за време на паузата, се смееле и му помогнал да ја натовари опремата по настапот. Потоа Бич заминал во блискиот бар „Low Tide“, каде што се дружел со членовите на друг бенд, танцувал и, според сведоштвото на пријателот, бил многу расположен.

- Advertisement -

Веста за неговата смрт ја потврди татко му Чарли во објава на Фејсбук, заблагодарувајќи им се на сите што испратиле пораки за поддршка. Но, покрај болката, тој упати и конкретно барање: ги повика жителите да контактираат со окружните власти и да побараат поставување предупредувачки светла и сообраќајни знаци од двете страни на опасниот свиок.

– Несреќата на Си-Џеј се случи на истото место како и претходната. Грмушките таму сè уште не беа ни пораснале повторно – напиша тој, објаснувајќи дека тоа е единственото нешто што го бара во спомен на синот.

Од младиот музичар се прости и неговиот постар брат Маршал Инглиш Бич, со емотивна порака во која напиша дека ова е најтешкото нешто што морал да го каже.

– Не велам збогум, туку до повторна средба во следниот живот, мој мал брате – порача тој.

Бич беше пејач, текстописец и гитарист на групата „CJ & the Deadmen“, а настапуваше и самостојно. Во 2022 година го основал фестивалот „Deadman Walking“, со цел да им даде можност за настап на локалните и независните музичари и да ја поврзе музичката заедница. Фестивалот годинава ја одбележал петтата годишнина. Неговата последна објава на Инстаграм била споделена на 3 ноември и прикажува изведба на неговата авторска песна „Cigarettes“.

Семејството најавило дека на 21 ноември ќе организира прослава на неговиот живот, а наместо цвеќе, ги повикало луѓето да донираат за театарот „The Palaver Tree“, место што имало посебно значење за младиот музичар.