Мировни преговори за Украина без Европа? Кремљ открива кој ќе седне на масата

Кремљ во понеделникот соопшти дека мировните преговори за Украина, кои треба да се одржат оваа недела во Абу Даби, ќе се одвиваат во трилатерален формат со учество на руска, украинска и американска делегација, без присуство на европски претставници.

Изјавата на портпаролот на Кремљ, Дмитриј Песков, дадена пред новинарите, е во спротивност со наводите на францускиот министер за надворешни работи, Жан-Ноел Баро, кој во неделата навести дека француски претставници ќе учествуваат на средбата на 10 и 11 ноември.

Се очекува на средбата да се разговара за ставање крај на војната во Украина, за безбедносните гаранции по војната и за деескалација на конфликтот.

- Advertisement -

„Во Абу Даби, во текот на наредните денови, ќе се одржат трилатерални преговори меѓу Русија и Украина, со посредство на Соединетите Држави“, изјави Песков.

Песков исто така напомена дека и Украина и Соединетите Држави одржуваат свои, посебни канали за комуникација со европските партнери.

„Што се однесува до присуството на Европејците, Американците имаат свои канали за комуникација со нив, а и Украинците имаат свои канали“, додаде тој за време на редовниот брифинг со новинарите.

Украинскиот претседател Володимир Зеленски во понеделникот изјави дека, во пресрет на разговорите во Абу Даби – кои се одвиваат со посредство на САД – ги усогласил ставовите со претседателката на Европската комисија, Урсула фон дер Лајен. „Со Урсула ги усогласивме и нашите ставови за средбата во Абу Даби. Правиме сè што можеме за трилатералниот формат да даде резултати“, напиша тој на социјалната мрежа „Икс“ (X).

Разговорите, закажани за вторник и среда, треба да ги оживеат дипломатските напори за изнаоѓање решение за конфликтот во Украина, кој започна во 2022 година со руската инвазија.