Трамп застанува во одбрана на шефот на „Нвидиа“ среде скандал поврзан со наводен кинески шпион

Американскиот претседател Доналд Трамп застана во одбрана на извршниот директор на „Nvidia“, Џенсен Хуанг, среде извештаи за поврзаност со наводен кинески разузнавачки агент, опишувајќи го како „чесен човек“.

Прашан за наводната поврзаност и истрагата што ја покрена одборот на американската компанија за полупроводници, Трамп во неделата изјави: „Мислам дека тој е чесен човек. Верувам дека веројатно има објаснување за тоа. Треба да се слушне неговата страна. Тој направи неверојатна работа за нашата земја“.

Весникот „Њујорк тајмс“ во неделата објави дека американскиот државен секретар Марко Рубио го надгледувал изготвувањето на доверлив разузнавачки документ, со кој високи претставници на администрацијата на Трамп биле предупредени за блискиот однос на Хуанг со наводен кинески разузнавачки агент.

- Advertisement -

Документот, составен под надзор на Рубио во текот на пролетта, бил доставен до високи функционери за национална безбедност пред државната посета на Трамп на Кина во мај.

Разузнавачките податоци, наводно, потекнуваат од електронски надзор врз кинеска деловна жена по име Алис Хуанг – која не е во роднинска врска со извршниот директор на „Nvidia“.

Таа била на висока раководна позиција во „Megaspeed International“, компанија за податочни центри со седиште во Сингапур, која набавувала напредни процесори за вештачка интелигенција додека била под федерална истрага поради наводно шверцување полупроводници во континентална Кина. Разузнавачките служби се обидувале да идентификуваат американски државјанин, чија пресретната комуникација укажувала на близок однос со Алис Хуанг. Според извештајот, дополнителната проверка покажала дека станува збор за Џенсен Хуанг.

Американските контраразузнавачки служби заклучиле дека кинеското Министерство за државна безбедност ја регрутирало Алис Хуанг како свој оперативен соработник.

Џенсен Хуанг првично не бил вклучен во официјалната деловна делегација што го придружувала Трамп во Кина. Сепак, откако медиумите го свртеа вниманието кон неговото отсуство, Трамп наводно интервенирал и овозможил шефот на „Nvidia“ да ѝ се приклучи на делегацијата во претседателскиот авион („Air Force One“) за време на застанувањето за полнење гориво на Алјаска, притоа нарекувајќи го „големиот Џенсен Хуанг“.

Трамп одбил да воведе какви било ограничувања за Хуанг или за „Nvidia“, бидејќи, според извештаите, тој смета дека доминацијата на овој производител на чипови на пазарот е од витално значење за економската конкурентност на САД и за финансиските пазари.