Хаосот на европското небо продолжува: Нови закани за поставени бомби во авиони

Лет на „Рајанер“ (Ryanair) од Рим за Лисабон слета утрово околу 8:00 часот, што ги натера надлежните органи да преземат соодветни мерки.

Серијата закани за поставени бомби во авиони ширум Европа продолжи и во петокот, опфаќајќи уште два лета. Најновото безбедносно предупредување се однесуваше на лет на „Рајанер“ кој патувал од Рим за Лисабон, пренесува „Еуроњуз“ (Euronews).

Според извештаите, предупредување за можна експлозивна направа во авионот било добиено преку анонимен телефонски повик упатен до контролната кула на аеродромот „Фјумичино“ во Рим.

- Advertisement -

Одделно, „Си-Ен-Ен Португалија“ (CNN Portugal) објави дека португалската Полиција за јавна безбедност (PSP) примила повик од лице кое се претставило како „службеник на органите на редот“ и предупредило на можна експлозивна направа во авион. Медиумите пренесуваат дека идентитетот на лицето што се јавило бил утврден од португалската Судска полиција (PJ).

Авионот на „Рајанер“ слета на аеродромот „Умберто Делгадо“ во Лисабон нешто пред 8:00 часот. Надлежните органи ја истражуваат заканата, иако засега нема потврда дека во авионот навистина имало експлозивна направа.

Кога „Еуроњуз“ стапи во контакт со аеродромот во Лисабон, оттаму ги упатија прашањата до Полицијата за јавна безбедност (PSP), која сè уште нема потврдено дали дошло до таков инцидент. „Еуроњуз“ се обиде да стапи во контакт и со Судската полиција, но не доби одговор.

Уште едно предупредување за бомба беше забележано на лет на „Виз ер“ (Wizz Air) од Прага за Рим. Авионот бил пренасочен кон Венеција, каде што и слетал.

Овие најнови инциденти се надоврзуваат на бранот закани за бомби што во четвртокот погодија најмалку 25 летови низ Европа. Претставници на Европската унија изјавија дека сè уште е прерано да се утврди дали овие инциденти се меѓусебно поврзани.