Пет луѓе три месеци плутале во чамец пред да бидат спасени

Пет луѓе, меѓу кои и две деца, се спасени во јужнопацифичката островска држава Кирибати откако три месеци плутале низ Тихиот Океан во чамец долг 20 стапки. Четири други лица се водат како исчезнати, соопштија властите.

Жителите на островот Фанинг на Кирибати ги пронајдоа преживеаните во неделата, објави австралискиот јавен радиодифузер ABC. Се проценува дека патувале околу 3.400 милји (5.400 километри) источно од Федералните држави Микронезија.

Американската крајбрежна стража во Гуам потврди дека чамец со 9 лица е пријавен за исчезнат. Бродот не се вратил на островот Руо во Микронезија на 30 јули. Започната е 10-дневна потрага, при што е пребарана површина од 33.000 квадратни милји (85.700 квадратни километри), но не е пронајдена никаква трага од пловилото или од луѓето на него.

- Advertisement -

– Неверојатна и прекрасна вест е што овие 5 лица се пронајдени и им е помогнато. Им изразуваме најдлабоко сочувство на семејствата и пријателите на оние кои не успеаја – изјави американската крајбрежна стража за Асошиејтед Прес.

На прашањето што се случило со преостанатите четворица исезнати, крајбрежната стража одговори дека продолжуваат да собираат и проверуваат информации и дека ќе бидат во контакт штом ќе имаат повеќе информации.

Пратеникот од Кирибати, Каотитаке Ракоро, изјави дека еден свештеник се грижи за преживеаните на островот.
Здравствениот работник Паукин Тороро рече дека сите петмина се дехидрирани и неухранети. Сите се на интравенски инјекции и покажуваат знаци на закрепнување.

– Тие веќе можат да се насмевнат и да покажат дека сакаат да јадат – рече Тороро.

Преживеаните сè уште не зборувале јавно за нивната тешка ситуација и побарале приватност, објави австралиската телевизија.

Според извештајот на ABC, деветте лица тргнале на едночасовно патување со брод помеѓу островите Мурило и Руо, но биле зафатени од бура за време на патувањето.