СПЕЦИЈАЛНИОТ ОБВИНИТЕЛ БАРА СМРТНА КАЗНА ЗА ПОРАНЕШНИОТ ПРЕТСЕДАТЕЛ НА ЈУЖНА КОРЕЈА

Јужнокорејскиот специјален обвинител денеска побара смртна казна за соборениот претседател Јун Сук Јол поради обид за бунт и воведување вонредна состојба во Јужна Кореја во декември 2024 година.

Вишиот суд во Сеул сè уште не го одредил датумот за изрекување на пресудата по жалбата на Јун на казната доживотен затвор, што во февруари ја изрече Централниот окружен суд во Сеул.

Судот утврди дека Јун незаконски ги ангажирал армијата и полицијата за да ја заземе законодавната власт, да ги уапси политичките противници и да воспостави неограничена власт на „значителен временски период“.

- Advertisement -

И специјалниот обвинител Чо Еун-сук исто така вложи жалба на пресудата тврдејќи дека Јун заслужува смртна казна бидејќи неговите постапки претставуваат сериозна закана за демократијата.

Јун на 3 декември 2024 година прогласи вонредна состојба, која траеше неколку часа, а пратениците ја пробија блокадата пред Народното собрание во Сеул и ја поништија одлуката на тогашниот претседател.

Против Јун се водат шест кривични постапки, а тој е во притвор. Тој беше сменет во април. Неговата одлука за воведување вонредна состојба предизвика најголема политичка криза во Јужна Кореја во изминатите неколку децении.

Јужна Кореја има долга историја на судски процеси против поранешни претседатели, но ниту еден од нив досега не бил погубен. Единствениот поранешен шеф на државата кому судот му изрекол смртна казна е Чон Ду Хван, во 1996 година. Казната подоцна му била заменета со доживотен затвор, а тој бил помилуван и починал во 2021 година. Речиси три децении подоцна, смртната казна повторно е во центарот на вниманието поради случајот на поранешниот претседател Јун Сук Јол.