Едно лице загина, а осум се ранети во напад врз аеродромот во Дамам, Саудиска Арабија

Едно лице загина, а осуммина се ранети во напад што се случи доцна во средата врз Меѓународниот аеродром „Крал Фахд“ во Дамам, во источниот дел на Саудиска Арабија, соопшти државната управа за цивилно воздухопловство.

Од Генералната управа за цивилно воздухопловство (GACA) изјавија дека ранетите веднаш биле пренесени во болница; сериозноста на нивните повреди варира од полесни до тешки.

Во нападот е причинета материјална штета, чиј обем властите сè уште го проценуваат, се додава во соопштението.

- Advertisement -

Властите не прецизираа за каков вид на напад станува збор.

Претходно во средата, саудиското Министерство за енергетика соопшти дека две лица загинале, а две други се ранети од остатоци што паднале откако противвоздушната одбрана пресретнала беспилотно летало (дрон) насочено кон објект на компанијата „Арамко“ на нафтеното поле „Шајбах“ во Источната провинција.

Остатоците предизвикале пожар во возило на еден од изведувачите, но работењето на нафтеното поле не било попречено, наведуваат од Министерството.

Коалицијата предводена од Саудиска Арабија во средата објави дека пресретнала и уништила пет беспилотни летала лансирани кон Кралството, меѓу кои и такви насочени кон Источната провинција и регионот на Медина.

Меѓународниот аеродром „Крал Фахд“ и претходно бил цел на напад, на 11 октомври, по што биле извршени проценки на штетата и безбедносни проверки. Инцидентите се случуваат во услови на ескалација на непријателствата меѓу јеменската група Хути и коалицијата предводена од Саудиска Арабија, при што се напаѓаат саудиски аеродроми и енергетски постројки.