НОВАТА АМБАСАДОРКА НА ТРАМП ПРЕДИЗВИКА ШОК НА СОЦИЈАЛНИТЕ МРЕЖИ

Американската администрација ја претстави Барбара Торнхил како нова специјална амбасадорка задолжена за следење и борба против трговијата со луѓе. Но, фотографијата објавена на социјалната мрежа Икс брзо стана вирална од сосема друга причина – наместо за нејзината нова функција, корисниците почнаа да го коментираат нејзиното лице.

Портретот го објави Рајли Барнс, помошник-државен секретар за демократија, човекови права и труд, кој ѝ посака добредојде во тимот на Стејт департментот. Објавата собра милиони прегледи, а под неа се појавија илјадници коментари.

– Морав да проверам дали ова е сатиричен профил – напишала една корисничка. Други се прашуваат дали фотографијата е вистинска и дали можеби била дигитално изменета. Некои коментари беа потсмешливи, додека други ја поврзаа нејзината појава со таканареченото „лице од Мар-а-Лаго“.

- Advertisement -

Овој израз се користи на интернет за да опише одредена естетика што дел од корисниците ја поврзуваат со жените од политичкиот и општествениот круг на Трамп. Најчесто се споменуваат нагласени јагодици, полни усни и затегната кожа.

Некои корисници ја споредуваа со Сузан Дел, сопругата на милијардерот и основач на технолошката компанија „Дел“, Мајкл Дел, чиј изглед исто така неодамна беше тема на интернет-дискусии. Други, пак, реагираа на начинот на кој жените се изложуваат на потсмев поради физичкиот изглед, сметајќи дека вниманието треба да биде насочено кон нивната работа и квалификации.

Инаку, Барбара Торнхил е деловна жена и филантропка од Лос Анџелес, а претходно била претседателка на компанијата „Импакт дизајн“, специјализирана за внатрешно уредување. Студирала на Калифорнискиот универзитет во Лос Анџелес, Универзитетот „Џорџ Вашингтон“ и Државниот универзитет на Северна Каролина. Според објавените биографски податоци, во 2019 година била номинирана за американска амбасадорка во Сингапур, но таа номинација не била реализирана.

Торнхил финансиски ги поддржувала и политичките активности на Трамп. Според податоците наведени во медиумските извештаи, во декември 2024 година донирала 98.527 долари за комитетот за организација на инаугурацијата на Трамп и Џеј-Ди Венс, а во јуни 2025 година донирала уште 44.300 долари за програмата „Тим 100“ на Републиканскиот национален комитет.

Нејзината нова функција е поврзана со координирање на американските напори за следење и сузбивање на трговијата со луѓе на меѓународно ниво. Во официјалната објава Барнс ја нарече трговијата со луѓе сериозно кршење на човековите права и меѓународен криминал во кој мажи, жени и деца се експлоатираат заради профит.