Сè поголеми разлики меѓу земјите-членки на ЕУ во врска со пристапувањето на Украина

Сè поголема поделеност меѓу земјите-членки на ЕУ во врска со пристапувањето на Украина
Студијата објавена денес од германската фондација „Бертелсман“ открива сè поголем јаз меѓу земјите-членки на Европската Унија во однос на тоа дали Украина треба да стане дел од Унијата во блиска иднина и до кој степен ЕУ би имала корист од таков потег.

Иако огромно мнозинство Украинци – 83 отсто – го поддржуваат членството и изразуваат подготвеност да го понесат товарот на краткорочните трошоци за пристапување, поддршката за членство во блиска иднина меѓу земјите-членки на ЕУ паднала на просечни 47 отсто, при што 53 отсто се противат на одлуката, според анкетата спроведена во десет земји на ЕУ.

Сепак, постојат значителни разлики меѓу овие земји-членки. Поддршката е најниска во Романија, со само 40 отсто.

- Advertisement -

Иако Германија предводи во обезбедувањето воена и финансиска помош за Украина, студијата забележува дека таа е на второто место по скептицизам, при што само 41 отсто го поддржуваат забрзаното пристапување на Киев.

Покрај Германците, само 43 отсто од Полјаците и 43 отсто од Французите ја поддржуваат забрзаната интеграција на Украина во ЕУ. Спротивно на тоа, 69 отсто од Швеѓаните, како и 63 отсто од Шпанците и Португалците, би поздравиле Украина да стане дел од ЕУ што е можно поскоро.

Студијата укажува дека оваа промена во јавното мислење одразува пад со текот на времето – од почетокот на руската агресија во 2022 година – на подготвеноста на Европејците да ја заштитат Украина.

Покрај овој пад на подготвеноста, опаѓа и верувањето дека ЕУ би имала корист од членството на Украина. Кога биле прашани за главните придобивки од членството на Украина во ЕУ, само 14 отсто од граѓаните изразиле уверување дека тоа би ја направило Унијата посилна и повлијателна на глобално ниво, додека само 11 отсто сметале дека тоа би ја зајакнало отпорноста на ЕУ.

Анкетата исто така откри дека Украинците и Европејците имаат значително различни ставови за тоа кој најмногу придонесува за одбраната на ЕУ од евентуален руски напад. Според истражувањето, 29 отсто од граѓаните на ЕУ сметаат дека Унијата дава најголем придонес, додека само 16 отсто сметаат дека тоа го прави Украина. Дваесет и три отсто од испитаниците сметаат дека двете страни придонесуваат подеднакво, а 32 отсто сметаат дека придонес дава и трета страна.

За разлика од тоа, само 11 отсто од Украинците изјавиле дека ЕУ најмногу придонесува за сопствената одбрана; 58 отсто сметаат дека тоа го прави Украина, а 22 отсто сметаат дека придонесот е еднаков.

Во студијата се наведува дека, иако постоеше изразено единство во рамките на ЕУ за време на почетната фаза од руската инвазија врз Украина, постигнувањето политички консензус со текот на времето станува сè потешко.

„Затоа, неопходно е постојано да им се објаснува на луѓето низ ЕУ дека инвестирањето во Украина се исплати и е од корист за цела Европа“, се заклучува во студијата.