Ирски министер: Намалувањето на помошта за развој од ЕУ им ги отвора вратите на Русија и Кина

Намалувањето на средствата за помош за развој од ЕУ ќе создаде вакуум што ќе го пополнат Русија и Кина, што ќе доведе до зголемена миграција кон Европа, изјави ирскиот министер за меѓународен развој, Нил Ричмонд.

„Ако го намалите буџетот за развој на една земја, тоа ги принудува луѓето да се иселуваат. Ако луѓето немаат пристап до квалитетни здравствени системи или ако инфраструктурата околу нив се распаѓа, тие ќе заминат“, изјави Ричмонд за „Политико“ во Брисел, пред денешната средба на министрите за развој на ЕУ во Даблин.

Ова е прва средба на министрите за развој на ЕУ по речиси две години – факт што, според Ричмонд, одразува како хуманитарната помош го изгубила своето значење на глобалната агенда.

- Advertisement -

„На глобално ниво, во изминатата година забележавме пад на соработката за развој од над 23 проценти, предизвикан не само од намалувањето на средствата од САД, туку и од многу земји-членки на ЕУ“, рече Ричмонд, истакнувајќи дека Ирска и Шпанија се единствените две земји што ги зголемиле своите буџети за развој.

Програмата „Глобална Европа“ – главниот фонд на ЕУ за финансиска помош на земји надвор од блокот – е меѓу областите што се соочуваат со потенцијално намалување на средствата според ирскиот предлог за повеќегодишната буџетска рамка на ЕУ.

Некои членки на ЕУ бараат значителни намалувања
Европската комисија предложи повеќегодишен буџет од приближно два трилиони евра за периодот 2028–2034 година; некои земји-членки ја критикуваа оваа сума како прекумерна, барајќи значителни намалувања. Некои земји предложија намалување на средствата за помош за развој за да се зачуваат ресурси за други области, како што се одбраната, земјоделството и кохезионата политика.

Се очекува Ирска, која моментално претседава со ЕУ, утре да ја претстави својата преговарачка рамка за буџетот, според „Политико“.

Дипломат од земја-членка на ЕУ, кој сакаше да остане анонимен, ги спореди овие намалувања со драстичното кратење на средствата за USAID за време на администрацијата на американскиот претседател Доналд Трамп, наведувајќи дека тоа би им ги отворило вратите на Москва и Пекинг.

Ричмонд нагласи дека обезбедувањето помош е во геостратешки интерес на Европа. „Колку повеќе се повлекуваат САД и ЕУ, толку повеќе тој простор во голема мера го пополнува Русија“, рече тој, укажувајќи на операциите на Кремљ насочени кон зголемување на влијанието во Африка, како и на напорите на Кина, Турција и други актери да го зајакнат своето присуство.