Првите луѓе на нафтените копании предупредуваат дека остануваат помалку од 6 милијарди барели комерцијални залихи

Количината на нафта во складишта достапна за глобалниот пазар се намалува, предупредија индустриските лидери на форум во Лондон каде што разговараат за последиците од конфликтите на Блискиот Исток и Украина и нивното влијание на енергетските пазари.

– Денес, остануваат помалку од 6 милијарди барели комерцијални залихи, а огромното мнозинство од нив не се практично достапни, па системот е веќе под големо оптоварување – рече Амин Насер, извршен директор на саудиската државна нафтена компанија „Сауди Арамко“.

Според него, од почетокот на кризата на Блискиот Исток оваа година, повеќе од милијарда барели нафта се ослободени од претежно копнено комерцијално складирање, што беше последниот голем достапен механизам.

- Advertisement -

Меѓународната агенција за енергија (ИЕА), која ги надгледува пазарите на нафта на Запад и ги координира стратешките резерви, се подготвува да ослободи 100 милиони барели сурова нафта и дизел за да помогне во ублажување на вртоглаво растечките цени на дизелот. Сепак, не е јасно дали таа сума ќе ги вклучи и дел од залихите од нивната рекордна прва интервенција во март (кога беа пуштени 400 милиони барели), кои сè уште не стигнале на пазарот.

– Потребни беа многу преговори, но станува збор за околу 100 милиони барели.Залихите достигнуваат критично ниво. Достапни се само 10% или помалку, што им го отежнува обезбедувањето на тие 100 милиони барели – рече Насер во врска со одлуката на ИЕА.

Според ИЕА, светската побарувачка за нафта е околу 102 милиони барели дневно.

– Губењето на заштитните резерви на нафта го направи пазарот поранлив – рече Мајк Верт, извршен директор на „Шеврон“, додавајќи дека тоа го зголемило ценовниот долен дел за нафтата.

Превирањата на пазарот на нафта ќе продолжат и по следната година, рекоа раководителите на компанијата, со оглед на тоа дека може да поминат години пред да се надополнат залихите, а воедно да се задоволи глобалната побарувачка.

Не целата нафта што се складира е веднаш употреблива поради оперативни фактори, како што се седиментот на дното на резервоарите или нафтата во цевководи, како и политички фактори, како што се владините регулативи што налагаат минимални нивоа на резерви во итни случаи.

– Постои огромна побарувачка за изградба на дополнителни резерви низ целиот свет – додаде Насер.

Извршниот директор на Кувајтската нафтена корпорација, шеикот Наваф Ел-Сабах, рече дека неговата компанија планира да го прошири капацитетот за складирање и во земјата и во своите рафинерии во странство.

– Светот зависи од извозот на нафта по море од Блискиот Исток „за да се одржи рамнотежа во текот на зимата бидејќи нема повеќе резерви на Запад за консумирање“ – рече Расел Харди, извршен директор на компанијата за трговија со стоки Витол.

Според податоците од Министерството за енергетика, залихите на сурова нафта во стратешките резерви на САД се на најниско ниво од октомври 1982 година.

Залихите на природен гас се исто така исцрпени, што ги прави цените подложни на ненадејни скокови.

– Суровата зима би можела да доведе до „крвава бања“ на пазарот на гас во првиот квартал од 2027 година ако нивоата во складиштата паднат на минимум- изјави извршниот директор на „Петронас“, Тенгку Мухамед Тауфик.