Американскиот пејач Реј Џеј итно бил пренесен во болница откако му се слошило за време на директен прено

Американскиот пејач Реј Џеј итно бил пренесен во болница откако му се слошило за време на директен пренос. Четириесет и петгодишниот музичар емитувал програма од студиото „Фаб фактори“, а со него била и неговата мајка, Соња Норвуд. Според извори на американскиот портал ТМЗ, имал проблеми поврзани со срцето.

На местото биле повикани итната медицинска помош и пожарникари. На снимката од преносот се гледа како медицинските екипи му помагаат, а потоа го внесуваат на носилки во возилото на итната помош. Според ТМЗ, повикот бил исклучиво од медицинска природа и немало ништо сомнително во инцидентот.

- Advertisement -

Ова е последниот во низата здравствени проблеми на пејачот. Во мај тој учествувал во ММА-борба во Лас Вегас против интернет-ѕвездата Супа Хот Фајр, при што бил нокаутиран во втората рунда. По борбата бил хоспитализиран, а лекарите проверувале дали има потрес на мозокот и проблеми со срцевиот ритам.

Во јануари годинава Реј Џеј исто така бил во болница поради болки во пределот на срцето и воспаление на белите дробови. Подоцна изјавил дека лекарите му препорачале строго мирување и дека зема лекови за холестерол и терапија што се користи кај лица изложени на ризик од срцева слабост.

Пејачот претходно објави и загрижувачка порака во која тврдеше дека можеби му остануваат само неколку месеци живот. Во меѓувреме, учествува во 180-дневен маратонски директен пренос наречен „Рејхаб“, за време на кој, според медиумските извештаи, останувал буден и по неколку дена.

Реј Џеј, чие вистинско име е Вилијам Реј Норвуд Џуниор, е Р енд Би пејач и актер, познат и по поранешната врска со Ким Кардашијан.