Неколку пациенти во Црна Гора развиле симптоми на ботулизам по примање ботокс, но нивната состојба е стабилна

Неколку пациенти во Црна Гора развиле симптоми на ботулизам по примање ботокс, но нивната состојба е стабилна. Лекарите се сомневаат дека бил употребен неисправен или лажен препарат означен како „Диспорт“, пренесува Н1.

Тие се стабилни и не се во животна опасност, изјави неврологот Балша Вујовиќ за телевизијата „Вијести“.

Станува збор за исклучително ретка реакција. Вујовиќ вели дека невролозите практично немале можност да видат ваков случај во последните 20 години.

- Advertisement -

Ботулинскиот токсин може да се прошири и на мускули на кои не требало да влијае. Последиците може да бидат спуштени очни капаци, двоен вид, асиметрија на лицето и несакана мускулна слабост.

Во потешки случаи може да се појават проблеми со голтањето, промени во гласот и тешкотии со дишењето.

– Ако некој почувствува слабост при голтање, промени во гласот или силна слабост на мускулите на лицето, тоа е аларм за пријавување кај лекар – изјавил Вујовиќ.

Неколку пациенти биле примени и хоспитализирани во Клиничкиот центар минатата недела по примање ботулински токсин. Болницата тогаш соопшти дека постои основано сомнение оти бил употребен неисправен или лажен препарат означен како „Диспорт“.