Најмалку 11 лица загинаа во пукање во Јужна Африка

Вооружени лица убија 11 лица и ранија тројца други во пукање што се случило во текот на ноќта во дом во јужноафриканската провинција КваЗулу-Натал, објавија локалните медиуми, повикувајќи се на агенцијата Анадолу.

Пукањето се случило во населбата КваМакута, јужно од Дурбан, објави јужноафриканскиот информативен канал eNCA, напоменувајќи дека меѓу жртвите имало и бремена жена.

Десет жртви починале на самото место, додека уште едно лице им подлегнало на повредите за време на транспортот до болницата.

- Advertisement -

Жртвите биле собрани во дом во таа област кога непознати напаѓачи упаднале во објектот и отвориле оган, кратко пред 23:00 часот по локално време во вторникот.

Пред да побегнат од местото на настанот, напаѓачите запалиле возило што му припаѓало на сопственикот на куќата.

Мотивот за смртоносниот напад останува непознат, а властите не објавија информации за апсења ниту пак идентификуваа какви било осомничени лица.