„АЛИБАБА“ И 20 ГИГАВАТИ ВО ДАТА ЦЕНТРИ

Кинеската групација „Алибаба“ го забрзува проширувањето на своите центри за податоци во Европа и на Блискиот Исток, додека се стреми да изгради сопствена глобална инфраструктура од 20 гигавати, во услови на интензивирање на конкуренцијата меѓу Кина и САД за чипови и модели на вештачка интелигенција, јави „Блумберг“.

Кинескиот лидер во е-трговијата ќе ги постави своите први капацитети за складирање во облак во Турција, Финска и во Холандија во текот на следните 12 месеци, изјави извршниот директор на „Алибаба“, Ли Фејфеи, на годишната конференција на компанијата во Хангжу.

Компанијата ќе го прошири своето присуство во центрите за податоци во Малезија, Германија, Обединетите Арапски Емирати, Франција и во Хонг Конг, зголемувајќи ја својата способност да обезбедува локализирани услуги во облак и алатки за вештачка интелигенција.

- Advertisement -

Брзата експанзија на „Алибаба“ значи дека компанијата сѐ повеќе се натпреварува со западните гиганти како што се „Амазон.ком“ и „Алфабет Инк.“ во региони надвор од Азија. Нејзините глобални амбиции се совпаѓаат со визијата на кинескиот претседател Шји Џинпинг за прикажување на достигнувањата на земјата пред светот во време кога претставниците во администрацијата на претседателот Доналд Трамп ги повикуваат другите земји да дадат приоритет на користењето на американската технологија и да избегнуваат алтернативи од Кина.

Глобалната мрежа на услуги во облак на „Алибаба“ се протега од Јапонија до Југоисточна Азија и Блискиот Исток. Во изминатите месеци, компанијата отвори нови објекти во Бразил и во Франција за да обезбеди услуги за генеративна вештачка интелигенција за локалните бизниси.