Тајфунот однесе девет животи во Јапонија; четворица се сè уште исчезнати

Бројот на загинати од тајфунот „Дуџуан“ во Јапонија се искачи на девет, објавија денеска јапонските медиуми. Во меѓувреме, спасувачките екипи во префектурите Чиба и Канагава, источно од Токио, сè уште трагаат по четворица исчезнати луѓе.

Додека „Дуџуан“ беснееше низ Јапонија во понеделникот и вторникот, околу 46.000 домаќинства останаа без електрична енергија; смртни случаи беа регистрирани во префектурите Чиба и Канагава, во регионот Канто на островот Хоншу.

Беа откажани стотици летови и железнички линии, а беа издадени и препораки за евакуација за нешто помалку од два милиони луѓе.

- Advertisement -

Поплавите и лизгањето на земјиштето предизвикани од 25-тиот тајфун во сезоната нанесоа значителна штета на префектурата Чиба, која претходно беше погодена од невремиња и на почетокот на овој месец и во август.