ЛЕЈДИ ГАГА Ѝ ГО ДАДЕ НА ЌЕРКАТА ИМЕТО ОД СВОЈОТ НАЈПОЗНАТ МУЗИЧКИ МОМЕНТ

Лејди Гага и нејзиниот свршеник Мајкл Полански станаа родители на девојче, а речиси три месеци по нејзиното раѓање во јавноста се откри и името на бебето. Иако веста за раѓањето стигна дури во септември, девојчето всушност е родено во јуни и се вика Роуз Бин Полански, а значењето на името е тесно поврзано со музичката кариера на познатата пејачка.

Според информациите на „Пипл“, кои се повикуваат на извор близок до парот, девојчето е родено на 9 јуни 2026 година во Лос Анџелес. Документот за раѓање, до кој дошол ТМЗ, го наведува и точното време – 23:19 часот.

Името Роуз, односно Роза, според изворот на „Пипл“ е инспирирано од „La Vie En Rose“ – песната која Гага ја изведе во филмот „A Star Is Born“ од 2018 година. Нејзината изведба на познатата француска песна стана еден од впечатливите моменти од филмот, а Гага има и голема тетоважа од роза по должината на ‘рбетот, покрај која стои испишано „la vie en rose“.

- Advertisement -

Уште поинтересно е средното име. „Бин“ наводно е инспирирано од Карл Бин, пејач и активист кој, според изворот на „Пипл“, бил една од инспирациите за песната „Born This Way“ која Гага ја објави во 2011 година. Така, името на девојчето поврзува две значајни точки од кариерата на нејзината мајка – „La Vie En Rose“ и „Born This Way“.

Гага и Полански досега не се огласија јавно за ќерката, а нивните претставници исто така немаат дадено официјален коментар. Изворите, сепак, велат дека пејачката е пресреќна по раѓањето на првото дете и дека парот летово одвоил време од работните обврски за да биде со бебето.

За Гага мајчинството е нешто за кое со години отворено зборуваше. Уште во 2019 година, во разговор со Ники Туторијалс, таа кажа дека во нејзините планови за следните десет години се и децата. Минатата година, во разговор со Стивен Колбер, повторно зборуваше за желбата да стане мајка, нарекувајќи го мајчинството „мојата следна главна улога“.

Гага и Полански се заедно од 2019 година, а нивната врска стана јавна во 2020 година. Тој ѝ се придружуваше и во дел од нејзините професионални проекти – Полански беше коавтор и копродуцент на повеќе песни од албумот „Mayhem“ од 2025 година. Двојката се сврши во 2024 година, а досега нема официјална потврда дека се венчале.

 Последните информации за семејството се појавија откако Гага и Полански беа забележани со бебето во Северна Калифорнија.