Пукање во средно училиште на Филипините; најмалку едно лице загина

Најмалку едно лице загина, а четворица други се повредени во пукање во средно училиште во јужниот дел на Филипините, соопшти денеска локалниот гувернер.

Пукањето се случило во градот Банга, во провинцијата Јужен Котабато, и следи по два слични инциденти со пукање во училишта што се случија во јуни, пренесува Ројтерс.

Гувернерот на провинцијата, Реиналдо Тамајо, изјави дека најмалку едно лице загинало, а четворица биле ранети, но не даде детали за напаѓачот или за жртвите.

- Advertisement -

Полицијата претходно го потврди инцидентот, а Министерството за образование изрази длабока загриженост.

Во јуни, најмалку тројца ученици загинаа, а околу 20 беа повредени во напад во јавно средно училиште во Таклобан, каде што двајца ученици отворија оган во училишниот двор.

Филипините имаат релативно строги прописи за поседување оружје, вклучувајќи проверки на минатото и барања за психолошка проценка, иако нелегалното оружје сè уште е во оптек.