Банката за развој на Советот на Европа (ЦЕБ) соопшти дека потпишала договор со македонската влада за обезбедување грант од 250.000 евра за високо образование од шпанската сметка за социјална кохезија на банката

Банката за развој на Советот на Европа (ЦЕБ) соопшти дека потпишала договор со македонската влада за обезбедување грант од 250.000 евра за високо образование од шпанската сметка за социјална кохезија на банката.

„Грантот ќе обезбеди насочена техничка помош за да помогне во подготовката и започнувањето на инвестициски проект во корист на Универзитетот Св. Кирил и Методиј (УКИМ) во Скопје, најголемиот јавен универзитет во Северна Македонија“, соопшти ЦЕБ во соопштение за медиумите.

Овие пари, како што информира на својот Фејсбук профил министерката за образование Весна Јаневска,  ќе бидат додадени на финансиската конструкција за реализација на проектот за изградба на новите објекти за ФИНКИ и Факултетот за физичко образование, спорт и здравје во Скопје.

- Advertisement -

-Оваа поддршка ќе го забрза отпочнувањето и завршувањето на проектот – вели Јаневска во постот.

Договорот за грант е потпишан вчера со шпанскиот амбасадор Рафаел Сориано Ортиз и вицегувернерот на Банката за развој при Советот на Европа (ЦЕБ) за целни земји, Томаш Бочек.

Поддршката на ЦЕБ за образовниот сектор во Македонија започна во 2007 година и досега има одобрено кредити за 10 проекти во јавниот сектор во вкупен износ од 314 милиони евра, а исто така има дадено и значајна поддршка за обезбедување инвестициски грантови и грантови за техничка помош за подготовка на проектите. Со пари од банката е овозможена изградба на 100 објекти за физичко образование и рехабилитација на 120 основни и средни училишта, од кои корист имаат околу 122.000 ученици.