Утре, Европскиот парламент ќе дебатира за глорификацијата на Ратко Младиќ во Србија

Членовите на Европскиот парламент и претставниците на Европската комисија утре ќе разговараат за глорификацијата на воените злосторства во Србија, во контекст на погребот на осудениот воен злосторник Ратко Младиќ, официјално објави ЕП.

Европскиот парламент потсетува дека „неколку илјади луѓе се собраа во главниот град на Србија, Белград, на погребот на Младиќ, кој почина на 84-годишна возраст додека отслужуваше доживотна казна затвор во затворот на Обединетите нации во Хаг, во Холандија“, објавува „Современа политика“.

„Младиќ беше осуден за геноцид од страна на Трибуналот на ОН за воени злосторства за неговото учество во масакрот во Сребреница во 1995 година, во кој беа убиени речиси 8.000 Бошњаци, вклучувајќи и момчиња. Еден министер во српската влада првично објави дека ќе биде организиран погреб за Младиќ со државни почести, но таквите планови подоцна беа променети, по жалбите од неколку европски лидери. И покрај пресудата на судот на ОН од 2017 година, некои делови од српската јавност и политичките структури сè уште го гледаат Младиќ како херој“, наведува Европскиот парламент.

- Advertisement -

Да ве потсетиме дека лидерите на Европската унија и земјите-членки остро ја осудија Србија за тоа што му даде погреб на Ратко Младиќ со државна поддршка и воени почести. Според официјалните изјави, величањето на ваквите лица, историскиот ревизионизам или негирањето на геноцидот ги кршат основните европски вредности и немаат место во земјите што се стремат кон членство во ЕУ.

Погребот на Младиќ, кој се одржа на 7 септември, формално го организираше неговото семејство, но Владата на Србија обезбеди логистичка поддршка, транспорт и безбедност. Министерот за правда Ненад Вујиќ првично објави дека Младиќ ќе добие државни и воени почести, но претседателот Александар Вучиќ подоцна изјави дека семејството ќе одлучи како да го организира погребот.

Сепак, на погребот присуствуваа неколку високи српски министри, вклучувајќи ги министрите за правда, одбрана, култура и јавни инвестиции, како и синот на Вучиќ. Вучиќ одлучи лично да не присуствува на погребот, но истакна дека „направил сè што било потребно и можно за да се спроведе погребот на достоинствен, сериозен и одговорен начин“.

Телото на Младиќ беше пренесено на 3 септември со авион на српската влада од Хаг до Белград.