СУДЕЊЕ НА ХАШИМ ТАЧИ ЗА ВЛИЈАНИЕ ВРЗ СВЕДОЦИ

Специјалниот суд за Косово во Хаг денеска го разгледува обвинението во случајот против поранешниот косовски претседател Хашим Тачи и неколку други лица осомничени за попречување на правдата.

Судењето за попречување на правдата почна кон крајот на февруари, а обвинети се и поранешниот командант на распуштената Ослободителна војска на Косово (ОВК) Исни Килај, поранешниот шеф на Косовската разузнавачка агенција (АКИ) Башким Смакај, поранешниот борец на ОВК Фадил Фазлиу и поранешниот министер за правда на Косово, Хајредин Кучи.

Според обвинителите, Тачи, Килај, Смакај, Фазлиу и Кучи се обиделе да влијаат врз сведочењето на сведоците во процесот во кој Хашим Тачи и тројца други поранешни команданти на ОВК се обвинети за воени злосторства и за злосторства против човештвото.

- Advertisement -

На денешното рочиште, на кое што беа сослушани завршните зборови на обвинителството, главната обвинителка Кимберли Вест изјави дека случајот на Тачи содржи „часови снимки и документи што сведочат за опструкција на правдата“.

Таа посочи дека Тачи формирал мали групи со други обвинети кои познавале одредени сведоци. Според неа, нивната цел била да го обликуваат сведочењето на сведоците на начин што ќе одговара на желбите на Тачи.

Вест посочи и дека Тачи им дал инструкции на другите обвинети како да ги променат своите претходни искази.

Четворицата поранешни команданти на ОВК, Хашим Тачи, Кадри Весели, Реџеп Селими и Јакуп Красниќи, беа притворени во Хаг на 4 и 5 ноември 2020 година, откако беше потврдено обвинението против нив за воени злосторства и злосторства против човештвото извршени за време на косовската војна во 1998-1999 година. Четворицата се изјаснија за невини и ги негираа сите обвиненија. Случајот против нив почна во Специјалниот суд за Косово во Хаг на 3 април 2023 година. На почетокот на февруари 2026 година, Обвинителството при Специјалниот суд за Косово во Хаг побара по 45 години затвор за секој од четворицата поранешни лидери на ОВК, а откако ги сослуша завршните зборови на страните на почетокот на годината, Специјалниот суд најави дека ќе ги објави казните на четворицата поранешни лидери на ОВК на 16 септември.