Нетанјаху се заканува со соборување на иранскиот режим

Израелскиот премиер Бенјамин Нетанјаху упати закани кон Иран за време на посетата на израелските трупи во јужна Сирија, изјавувајќи дека Исламската Република е пред колапс. Неговата посета на сириската територија се случи во момент кога повторно се интензивираат непријателствата во шестмесечната војна на Блискиот Исток. Дамаск го осуди присуството на Нетанјаху на сириска територија.

„Имаме уште работа. Главната задача е соборување на терористичкиот режим во Иран. Многу сме блиску до тоа“, рече израелскиот премиер Бенјамин Нетанјаху на сириската страна на планината Хермон, на границата меѓу Израел и Сирија, каде што престојуваше во посета заедно со израелскиот министер за одбрана Израел Кац.

Нетанјаху понатаму тврдеше дека „целата оска на крајот ќе се урне“ – мислејќи, според француската новинска агенција АФП, на вооружените групи на Блискиот Исток поддржани од Иран.

- Advertisement -

Израелските сили се стационирани во јужна Сирија – во таканаречената безбедносна зона – уште од падот на долгогодишниот сириски претседател Башар ал-Асад во декември 2024 година. Тие окупираат област што претходно беше тампон-зона под контрола на Обединетите нации, која ги раздвојуваше израелските и сириските сили на окупираната Голанска Висорамнина уште од 1974 година. „Нема да дозволиме ниту една терористичка армија да се вкорени на нашата граница“, нагласи Нетанјаху, кој и претходно најмалку двапати ги посетил израелските трупи во Сирија, последен пат во ноември минатата година.

И Кац упати закана кон Иран. „Веќе двапати го нападнавме, а доколку е потребно, ќе го сториме тоа и по третпат за да продолжиме да ги спречуваме заканите“, рече тој.

Израел нема да се повлече од безбедносната зона
Во видеоснимка направена на врвот на планината Хермон, министерот за одбрана Кац му порача на сирискиот претседател Ахмед ал-Шара дека израелските трупи нема да се повлечат од безбедносната зона.

Сириското Министерство за надворешни работи го осуди влегувањето на Нетанјаху на сириска територија како „нелегално“, означувајќи го како провокативен потег и „грубо кршење“ на суверенитетот на земјата, пренесува понатаму АФП. Под водство на Хафез ал-Асад и неговиот син Башар, Сирија беше близок сојузник на Иран и засолниште за проирански паравоени групи; сепак, овој сојуз заврши со падот на Башар ал-Асад.

Откако исламистичкиот лидер Ахмед ал-Шара ја презеде власта во Дамаск со помош на коалиција од бунтовнички групи, Израел изврши стотици напади во Сирија и повеќепати навлезе на сириска територија.