Мисијата на ОБСЕ во БиХ изрази загриженост во врска со преносот во живо на комеморацијата на Младиќ на RTRS

Мисијата на Организацијата за безбедност и соработка во Европа (ОБСЕ) во Босна и Херцеговина (БиХ) и нејзиниот претставник за слобода на медиумите денес изразија сериозна загриженост во врска со преносот во живо на комеморацијата на воениот командант на Војската на Република Српска (РС) и хашки осуденик Ратко Младиќ на Радио Телевизија РС Српска (РТРС), за време на која говорниците постојано го фалеа.

„Неговите пресуди за геноцид, злосторства против човештвото и кршење на законите или обичаите на војување беа потврдени по жалба во 2021 година, како и неговата доживотна казна затвор“, се вели во соопштението, објавено на официјалната веб-страница на Мисијата на ОБСЕ во БиХ.

Тие нагласија дека известувањето за настани од легитимен јавен интерес е суштински дел од слободата на медиумите и уредничката независност, додавајќи дека „додека известувањето за настани од јавен интерес спаѓа во доменот на уредничката одговорност на медиумите, фактот дека содржината што го величи осудениот воен злосторник е пренесена на пошироката јавност без соодветен уреднички контекст и без упатување на судски утврдени факти е особено загрижувачки“.

- Advertisement -

„Јавните радиодифузери имаат посебна одговорност да обезбедат точно, непристрасно и правилно контекстуализирано новинарско известување“, оценија тие во соопштението.

Мисијата на ОБСЕ во БиХ потсети дека Кривичниот законик на БиХ го предвидува како кривично дело величењето на лица осудени за вакви кривични дела и дека надлежните судски институции треба да утврдат дали емитувањето на комеморацијата на Младиќ можеби го прекршило Кривичниот законик.

Тие ја повикаа Агенцијата за регулирање на комуникациите (РАК) брзо и независно да го процени ова известување, вклучително и неговата усогласеност со Кодексот за програмска содржина на РАК, и да „одговори пропорционално на сите пронајдени прекршувања“.

„Почитувањето на судски утврдените факти и достоинството на жртвите и преживеаните е од суштинско значење за одговорното новинарство, помирувањето и трајниот мир во БиХ. Според тоа, секое медиумско известување за претстојниот погреб треба да биде точно, соодветно контекстуализирано и во согласност со применливите професионални и етички стандарди“, заклучија тие во соопштението.