Голем национален протест за 100 дена отпор против луксузниот проект на зетот на Доналд Трамп

Со голем национален протест во понеделник, 7 септември, Албанија ќе одбележи 100 дена протести против изградбата на голем туристички комплекс во заштитеното подрачје Вјоса-Нарта. Организаторите ги повикуваат граѓаните да се соберат во Тирана, а протестното движење се води под пораката „Албанија не е на продажба“. Според Patagonia Europe, во досегашните акции учествувале десетици илјади луѓе низ земјата.

Протестите започнаа на крајот на мај, откако градежна механизација влезе во подрачјето Вјоса-Нарта, во близина на Звернец, каде што е планиран луксузен туристички комплекс поврзан со инвестициската компанија на Џаред Кушнер, зетот на американскиот претседател Доналд Трамп. Противниците на проектот тврдат дека работите започнале без потребните дозволи и дека со интервенциите се уништуваат песочни дини и мочуришта во едно од највредните крајбрежни живеалишта во Албанија.

- Advertisement -

Протестот брзо ја надмина локалната еколошка тема. На демонстрациите во Тирана и во други градови почнаа да се поставуваат прашања за начинот на кој албанската влада располага со државното земјиште, транспарентноста на големите туристички инвестиции и заштитата на природните богатства. Организаторите бараат поголема отчетност од институциите и запирање на градежните активности што, според нив, го загрозуваат заштитеното подрачје.

Вјоса-Нарта е голем крајбрежен комплекс од лагуни, мочуришта, солени површини, песочни дини и острови на јадранскиот брег во близина на Валона. Областа е особено значајна за птиците преселници и е дел од поширокиот природен простор околу реката Вјоса, која во последните години стана еден од симболите на европската борба за зачувување на дивите реки и нивните екосистеми.

Случајот доби дополнително меѓународно внимание поради врската на проектот со Кушнер. Плановите за инвестиции во луксузен туризам во Албанија веќе подолго време предизвикуваат полемики меѓу Владата на Еди Рама, која во нив гледа можност за развој на туристичката индустрија и привлекување крупен странски капитал, и еколошките организации и дел од локалното население, кои предупредуваат дека економскиот развој не смее да се спроведува со уништување на заштитени природни подрачја.

По речиси сто дена демонстрации, 7 септември треба да биде најголемиот тест за силата на движењето. Patagonia Europe, која јавно ја поддржа кампањата, протестите ги опишува како отпор против корупцијата и борба за зачувување на природата. Организаторите, пак, сакаат стотиот ден да го претворат во национален собир и да покажат дека спорот околу Вјоса-Нарта прераснал во пошироко барање за поголема транспарентност и одговорност на албанските власти.